كوباية الشاي في الخمسينة ساعة الصُبحية، في البيت أو حتى على القهوة، وست البيت عاملة شوية بقسماط يفتح النفس، أو بياع البقسماط والسميط ماشي ينادي عليهم في الشارع.. ذكريات لقصص عشناها كلنا مع أكلات بسيطة ومش مكلفة.. نقدر نقول عليها فاتح شهية، أو وجبة تصبيرة (سناك) لذيذ وسريع كل أسرة مصرية أكلتها قبل كده أو لسه بتاكلها كعادة يومية صباحية، مع كوباية الحاجة السخنة!

طبعاً شئ رائع وجميل إننا ناكل أو ناخد تصبيرة حلوة الصبح نفطر بيها على السريع لحد ما الفطار يجهز، أو لحد ما نوصل أشغالنا ونطلب فطار مع زمايلنا.. بس الأحلى لما يبقى البقسماط ده معمول في البيت بطريقة صحية، من مكونات كلها تحافظ على صحتنا ورشاقة أجسامنا.. مهم نتغذى.. أكيد.. بس نتغذى إيه؟ ده السؤال اللى محدش يعرف يجاوب عليه غيرنا احنا نفسنا.. وعشان نكون عمليين ونساعد بنقدم لكم طريقة عمل بقسماط الكيتو أو الكيتون الصحية اللذيذة، يعني نستمتع بطعم جميل، وبصحة ممتازة.. اتنين في واحد.

طريقة عمل بقسماط:

المكونات:

١٠٠ جم دقيق لوز

٦٠ جم بذر كتان مطحون

٥ جم بيكنيج بودر

٢ جم ملح

٥٠ جم كريمة لباني (حلويات)

للزينة
حبه البركة، سمسم، كمون حب

طريقة التحضير:

في طبق عميق مناسب، نخلط جميع المكونات الجافة معا.

نُضيف كريمة الحلويات اللباني للمكونات الجافة، وتعجن بواسطة اليدين.

تُترك العجينة 10 دقائق (ترتاح) ثم تشكل على هيئة اسطوانية (رول رفيع)، وتُرش بحبة البركة أو الكمون الحب.

في فرن سبق تسخينه لمدة ربع ساعة، تخبز العجينة علي ١٤٠°م حتى نحصل على اللون الذهبي الفاتح.

دي كانت وصفتنا.. طريقة عمل بقسماط صحي باستخدام دقيق اللوز.. جربوها وإن شاء الله تعجبكم.. وشركونا صورها على صفحتنا الرسمية على الفيسبوك، وبالهنا.