طريقة تحضير دجاج مشوى


الفراخ المشوية الوصفة اللى كلنا بنهجم عليها أول ما تكون على سفرة الأكل أو لما نطلبها من مطعم.. الأكلة دى عالميا ليها شهرة واسعة وخصوصا فى الولايات المتحدة الأمريكية، وبتكون وصفة هايلة للناس اللى بتحاول تنزل وزنها أو لمرضى السكر.. الفراخ المشوية كمان بترضى أذواق الناس اللى مش بتحب اللحمة الضانى خصوصا فى موسم العيد الكبير ودبح الخرفان.. وبتكون حل ظريف إنك تشارك الناس أكل المشاوى بس من غير ما تضطر تاكل لحم الخرفان اللى مش بتحبه.. الفراخ المشوية ميتشبعش منها أبدا، وألذ ما فيها إنها لما بتتعمل صح بيفضل لحمها محتفظ بالعصارة بتاعته واللى بتخليه طرى دايما واحنا بناكله!!

ذكريات الفراخ المشوية فى حياتى كتيرة جدا، أغلبها مرتبط بفترة العيد الكبير، كان لازم يبقى عندنا فى البيت باستمرار فراخ قبل الدبح، لأن أختى أميرة مش بتاكل اللحمة الضانى نهائى، وبيكون بالنسبة لها البديل الوحيد إننا نشوى لها فراخ، وطبعا لازم نبدأ بشوى الفراخ على الشواية عشان متاخدش من ريحة اللحمة الضانى لو كنا بدأنا نشويها هى الأول.. كان كل مرة ننزل نشترى فراخ قبل العيد الكبير، كان لازم يبقى فيه أوراك أو صدور مخلية أى حاجة تنفع تتشوى.. وكان بردو لازم نراعى الكمية لأن الحكاية مش هتنتهى فى يوم واحد، الاجازة 5 أيام بحالهم، سبحان الله كلنا أسرة واحدة وكل واحد له نفس ومزاج معينة فى الأكل، يعنى أنا وإسراء لا يمكن ناكل اللحمة الضانى مطبوخة، ناكلها مشوية بس غير كده استحالة، معرفش ذوقنا طلع كده ليه، مع العلم إن بابا وماما بيحبوا اللحمة الضانى بكل طرق طبخها أو شويها وبيحبوا كل أجزاء الدبيحة كمان واحنا مطلعناش زيهم ليه معرفش!!

الفراخ المشوية أحسن طريقة ليها إنها تتعمل طبعا على الشواية الفحم، لكن لو مش متوفرة مش هنتعطل بردو لأن دلوقتى فى طاسات الشوى ودى بردوب تسد وتقوم بالواجب وزيادة، ده غير كمان إن فى بوتاجازات مجهزة بعين للشوى.. كله الوسائل هتؤدى للغرض المطلوب وهو فراخ مشوية، حتى لو مفيش أى وسيلة شوى من دول ممكن جدا نفس الخطوات اللى هنقولها فى طريقة التحضير تتعمل بس فى فرن البوتاجاز وبتدى طعم جميل! تعالوا مع بعض نتعرف على مكونات وطريقة تحضير الفراخ المشوية.

 

طريقة تحضير الدجاج المشوى:

المكونات:

دجاجة مقطعة إلى 6 أو 8 أجزاء

2 ملعقة طعام زيت زيتون

ملعقة طعام ملح

1/2 ملعقة طعام فلفل أسود مطحون

ملعقة شاى من التوابل الآتية: (بودرة ثوم، ببريكا)

 

طريقة التحضير.

يتم غسل الدجاج جيدا بشطفه ثم نقعه لمدة نصف ساعة فى وعاء عميق به ماء وخل وعصير ليمون، بعد النقع ترفع قطع الدجاج من الوعاء وتشطف مرة ثانية بالماء الجارى ثم تُصفى تماما من الماء الزائد وتترك جانبا.

فى وعاء أو طبق عميق يتم تحضير التتبيلة، حيث نضع زيت الزيتون والملح والفلفل الأسود والثوم البودرة والببريكا ونخلطهم جيدا بواسطة ملعقة مناسبة، ثم نضع قطع الدجاج المغسول فى الوعاء ونقلب القطع جيدا بواسطة اليدين حتى تتشرب القطع التتبيلة من جميع الجوانب.

بعد ذلك نقوم بتغطية الوعاء أو الطبق العميق بالورق البلاستيكى الشفاف ونقوم بوضعه فى الثلاجة (البراد) لمدة من 6 ساعات إلى 12 ساعة حتى يتشرب التتبيلة جيدا، وفى حالة عدم الاستعجال فى شوى الدجاج، يمكن وضعه فى الفريزر لمدة من يوم إلى 3 أيام، ويستخرج من الفريزر قبل الشوى بحوالى ساعتين.

يتم تجهيز الشواية سواء بوضع وإشعال الفحم أو بتشغيل الشواية الكهربية على درجة حرارة عالية، ثم نقوم بدهان الشواية بفرشاة مغمورة فى زيت الزيتون، وهذه الخطوة مهمة لتجنب التصاق قطع الدجاج بالشواية وتقطع لحمها نتيجة الالتصاق.

نقوم بوضعقطع الدجاج من ناحية الجلد، أو الجلد المنزوع، فى مواجهة النار مباشرة، ونتركها لمدة 5 دقائق، ثم نقوم بتقليبها على الوجه الآخر لمدة 5 دقائق أخرى، وذلك لنحصل على علامات الشواء من الجانبين، بعدها نقوم بقلب قطعة الدجاج على الوجه المحتوى على الجلد، ونقوم بتخفيض الحرارة إلى متوسطة، ونتركها على هذا الوجه لمدة تتراوح بين 25 – 35 دقيقة، وفى حالة الفرن الكهربى بعد قلب قطع الدجاج على الوجه المحتوى على الجلد، نقوم بتغطية الشواية الكهربية لنفس المدة المذكورة. ويمكن اتباع نفس الخطوات مع طاسة الشوى.

فى حالة عدم توفر أى وسيلة من الوسائل السابقة للشوى، يمكن تتبيل قطع الدجاج ووضعها فى صينية مناسبة وشويها فى فرن البوتاجاز.

يمكن كذلك دهان قطع الدجاج قبل رفعها من على النار بصوص الشواء (صوص الباربيكيو) والذى يعطيها مذاقا إضافيا رائعا. تُقدم قطع الدجاج المشوى مع السلطات المختلفة والأرز الأبيض المصرى.

 

نصائح مُهمة أثناء الشواء:

* من الضرورى وضع قطع الدجاج على الشواية على مسافات متباعدة بعض الشئ، أى لا تكون القطع ملتصقة ببعضها ولا تكون الشواية مزدحمة بالقطع.

* عدم الضغط نهائيا على القطع أثناء الشوى لا بواسطة شوكة ولا أى أداة أخرى، لأن ذلك سوف يتسبب فى خروج العصارة من قطع الدجاج وجفافها.

* فى حالة الشوى على الفحم يُراعى وضع مجموعتين من الفحم أحدهما تكون شعلتها مباشرة على قطع الدجاج والمجموعة الأخرى جانبية، لأن ذلك يُساعد فى توزيع درجة الحرارة على القطع وبالتالى تسويتها بشكل متكافئ.

* من الضرورى بعد تتبيل قطع الدجاج، وضعها على ورق النشاف، لإزالة أى سوائل ناتجة عن عملية التتبيل، وهذه الخطوة مهمة جدا قبل وضع القطع على الشواية.

* مدة تسوية الفراخ غير المخلية (بالعظم) حوالى 35 دقيقة، أما قطع الدجاج المخلية (أوراك وصدور) فتستغرق حوالى 12 دقيقة فقط لتصل لمرحلة التسوية الكاملة.

 

جربوا وصفتنا وقولوا لنا رأيكم فيها على صفحتنا الرسمية على الفيسبوك وبالهنا.