طريقة تحضير السُبيط المحشى


بيقولوا إن كل سكان المدن الساحلية وجبتهم المُفضلة هى المأكولات البحرية بكل أشكالها وأنواعها زى الجمبرى والاستاكوزا وكمان شوربة السى فوود.. وبالنسبة لنا احنا سكان العاصمة والمدة غير الساحلية.. بنختلف شوية.. في منا اللى بيحبوا المأكولات البحرية وفى اللى مش بياكلوها خالص.. وصفتنا النهاردة لمحبى وعشاق المأكولات البحرية.. عملنا لكم سُبيط محشى أو زى ما بيتقال عنه فى بعض المدن سيبيا.. تعالوا نتعرف سوا على المكونات وطريقة تحضير السُبيط المحشى .

 

طريقة تحضير السُبيط المحشى:

المكونات:

1 كيلو بطاطس (بطاطا) كبيرة الحجم وطولية الشكل

سيبيا (سُبيط)

بصل
جمبري وشراشيب السيبيا

البهارات (ملح. فلفل. كمون)

 

طريقة التحضير.

 

بداية كده السيبيا وشراشيبها لازم يتسلقوا الأول إلا لو هتقطعيهم شرايح، بتبليهم زي السمك وتقليهم بدون سلق بالدقيق شبه السمك بالظبط لكن طالما طبخ يبقى لازم نسلقهم في الشراشيب لأني هستخدمها في الحشوة هسلقها في مية عادي وبعد ما تتسلق هاشيلها واقصها بالمقص صغير أد حجم الجمبري (شوفوها هي الحتت اللي على الرز دي واللي فوق الرز دي شرشوبة كاملة بدون تقطيع) واخليهم على جنب هستخدمهم بقى فى الحشوة بعد كده هنعمل حشوة السيبيا وهي طعمها لذيذ جدا، هنجيب بصل حسب الكمية اللي هتعمليها ونفرمه في الكبة ونجيب حلة صغيرة نحط فيها حبة صغيرين من زيت الكريستال ونحط الجمبري مع قطع شراشيب السيبا نقلبهم يدوب لما الجمبري يحمر انزل بالبصل واحط ملح وفلفل وكمون وحبة مية صغيرين البصل يستوى فيها ونهدي النار تماما لحد ما يستووا.

 

نيجي بقى للسيبيا هي متنضفة وانتي بتغسيلها بمية وخل بتبقى زي الفل وطبعا مش هتسلقيها غير لما تحشيها، طبعا هي بتكون مفتوحة كده غير الكاليماري القرطاس بتكون مقفولة 

المهم هي مفتوحة كده تماما شبه كفين الإيد وهما جنب بعض، المهم الجنب المفتوح ده هاخده قبل ما أحشيه أقفله بالخلة (اللي هي خلة الأسنان) وهسيبه مفتوح من فوق عشان ده المكان اللي هحط الحشوة منه، تمام خلاص حشيناها نقفلها من فوق بالخلة برضو 

ونحطها بقى في مية عادية تتسلق واغطيها هتلاحظوا إن حجمها صغر عن قبل السلق وملمسها اختلف ودي طبيعة السيبيا، هنشيلها بقى لما تستوى ونحسها اتغيرت كده نشيلها من المية ونحمرها بدون دقيق في زيت كريستال برضو ونغطى عليها وهي بتتحمر عشان الزيت بيطرطش ولما تجي تقلبيها تحمريها على الناحية التانية تهدي النار وبعدين تفتحي عليها تقلبيها تتحمر على الناحية التانية ولما تطلع بشيل منها الخلة تماما و بقطعها كده بالشكل ده وبقدمها مع الرز

والرز اللي تحبيه مصري أو بسمتى سي فود أو بدون اللي يعجبك وممكن الشراشيب تعمليها سليمة بدون تقطيعها في صينية بطاطس بنفس خلطة البصل دي اللي بالجمبري تبقى في صينية البطاطس وفوقها الطماطم وتتغطى بفويل وجوه الفرن بتكون جميلة جدا، هي سهلة وطعمها محدش يقدر يقاومه بصراحة.

 

دى كانت وصفتنا النهاردة، لو عندكم أسئلة أو استفسارات عن الوصفة وطريقة التحضير، تقدروا توجههوا مباشرة لصاحبة الوصفة من خلال الرابط ده .. وبالهنا.