أول طبخة!! عمل أرز بالشعرية كان فعليا أول حاجة أنفذها فى المطبخ، والحمد لله نجحت فيه بشكل كبير من أول مرة، طلع مظبوط جدا ومفلفل جدا وشكله يفتح النفس، وكنت أخدت طريقته بالتليفون من بابا، عشان أختى كانت حامل وهتولد وضغطها كان مرتفع جدا ومكنتش قادرة تعمل أى حاجة، قلت أعمل فيها جدعة وأنا اللى أطبخ، وطبخت وظبطت معايا الحمد لله والكل قعد يحلف بطريقتى فى الطبخ وبنفسى الحلو فى الأكل وخصوصا الرز بالشعرية اللى طلع مفلفل ومستوى وبيلمع.

الرز بالشعرية أو طبخ الرز عموما بمختلف أنواعه، بيكون عُقدة عند كتير من البنات والسيدات، لأسباب كتيرة، ساعات لأنه بيعجن، أو بيتلسع من القعر، ومع ستات تانية مش بيستوى من النص كويس، ومن فوق بيكون ناشف، وتلاقى الحكاية عملت أزمة للبنوتة أو العروسة الجديدة اللى واقفة تعمل الرز فى بيتها، وفعلا بتحس لما مش بيظبط الرز معاها إنها فاشلة فى شغل المطبخ، أصل الرز أساسى فى سفرة الغدا المصرية ومفيش غنى عنه. وعشان كده هنقول طريقة سهلة وسريعة لعمل الرز المصرى بالشعرية وفى 10 دقيايق بس وهنكتب الطريقة والمقادير بالظبط بحيث تظبط مع أى بنت أو سيدة ويطلع طعمه حلو إن شاء الله.

المكونات:

2 كوب أرز مصرى

1 كوب شعرية

3 كوب شوربة (أو ماء صنبور)

3 ملعقة شاى ملح

2 ملعقة طعام زبدة

1 ملعقة طعام زيت ذرة

طريقة عمل أرز بالشعرية:

يُغسل الأرز جيدا بالماء الجارى، ثم يُصفى من الماء الزائد.

فى وعاء عميق، نضع ملعقة من الزيت النباتى مع الزبدة، ثم نُضيف الشعرية ونقلبها جيدا حتى تأخذ اللون الذهبى.

أثناء تحمير الشعرية، نقوم بتسخين الشوربة أو الماء، حسب المتوفر فى المنزل، فى وعاء عميق مناسب حتى تصل لدرجة الغليان.

تُضاف كمية الأرز المغسول إلى الشعرية، وتُقلب جيدا حتى تتشرب حبات الأرز من خليط الزبدة والزيت، ثم نضع 3 أكواب من الماء الساخن أو الشوربة إلى الأرز والشعرية، ثم نضيف 3 ملاعق شاى من الملح فى حالة استخدام ماء الصنبور، أما فى حالة استخدام الشوربة فلا نحتاج للملح لأن الشوربة تكون مُمَلحة، ويجب توخى الحذر من النسيان وإضافة ملح مع الشوربة للأرز حتى لا يفسد بالطعم المالح.

نُقلب المكونات، وبعد غليان الماء أو الشوربة لمدة دقيقتين مع الأرز والشعرية، نهدئ النار جدا، ونُغطى الوعاء، ونضع الشياطة أسفل الوعاء، ونترك الأرز بالشعرية حتى يصل لتمام التسوية؛ بعد حوالى 10 دقائق، نتأكد من تسوية الأرز بتذوق جزء منه بطرف ملعقة.

الوصفة دى فيها مميزات كتيرة أول حاجة، لما بنستخدم الزيت مع الزبدة ده بيكون ضرورى عشان بيحمى الزبدة من إنها تتحرق واحنا بنطبخ بيها، لو مفيش زبدة وهتستخدمى سمنة بردو تضيفى الزيت لأنه بيدى لمعة جميلة لشكل حبوب الرز والشعرية بيخلى شكلها جميل وجذاب فى الأكل، استخدام الشوربة المغلية أو الميه حسب المتوفر عندك فى البيت بيقلل مُدة التسوية جدا، وبيسرعها، يعنى لو راجعة من الشغل متأخرة وعايزة تنجزى الأكل بسرعة والتسوية تكون 100 – 100، اعملى الطريقة دى وهتتبسطى من نتيجتها، أهم شئ فى الموضوع تستخدمى المعيار الخاص بالميه أو الشوربة بالظبط، يعنى لو عملتى معيار الرز بكوباية معينة يبقى لازم وضرورى معيار الميه أو الشوربة يكون بنفس الكوباية.

دى وصفتنا للرز المصرى الأبيض بالشعرية، وصفة مُجربة كتير وعلى مدار سنين طويلة، وصفة ناجحة، وهى دى الوصفة اللى بيستخدمها الشيفات فى المطاعم والفنادق، عايزين نعرف التجربة دى نجحت معاكم واللا حصل مشاكل، شاركونا رأيكم وصوركم على صفحتنا الرسمية على الفيسبوك وبألف هنا.