فى حاجات كتير فى ذكرياتنا مُرتبطة بالأكل، يعنى لما الواحد(ة) يعدى على مكان يفتكر إنه أكل فيه أكلة وعجبته، أو لو سافر بلد واتعرف على أكلاتها الشعبية وعجبته، بيتمنى يرجع بلده يعرف ياكلها.. وساعات كتير لما بناكل حاجة وتطلع حلوة بزيادة من ايد حد، بتعلم فى الذاكرة وتتحفر فيها، إنها أحلى مرة كانت من ايد فلانة أو فى بيت فلانة.

بالنسبة لى حكاية الأكل والذكريات دى بتحصل معايا كتير، بس وصفة النهاردة ليها ذكرى خاصة جدا فى قلبى وأنا طفلة صغيرة جدا فى سن الابتدائى.. الكسكسى أكلته لأول مرة فى بيت الشاعر والأديب الإسلامي عباس الديب، رحمة الله عليه، كان سنويا بيدعى الناس والأقارب والأصحاب فى بيته وينشدوا أغانى فى حُب رسول الله، صلى الله عليه وسلم، واحنا كنا من المدعوين، كان بعد ما تنتهى جلسة الذكر والإنشاد، تبدأ رحلة إكرام الضيف، وإطعام الطعام، وكانت الوجبة الأساسية الكُسكُسى، كانت بتتقدم وجبة الكسكسى سادة وجنبها صوانى مليانة يخنى لحمة مفرومة، وصوانى لحمة مسلوقة، وأطباق سُكر بودرة وقِرفة، والكل يسمى باسم الله ويبدأ يغرف الكسكسى فى طبقه وياخد نصيبه من اللحمة، والكل ياكل ويتهنى، وبعدها يحلى بالكسكسى بردو بس مع السكر والقرفة.

فى الوقت ده عرفت وجبة الكسكسى وحبيتها، خصوصا مع السكر والقرفة، كنت ساعات بطلبها من ماما، بس كانت ستى أم أمى هى اللى بتلبى لى الطلب وبتعملها بإيديها الجميلة.. ولفت الأيام وكبرت، ولاقيت خالتى حميدة بتعمل الكسكسى وبيطلع تحفة من ايديها.. وطلبت منها تعلمنى طريقة تحضيره فى البيت، وبصدر رحب جت وعلمتنى الطريقة، اللى أجمل ما فيها، إنها مش محتاجة حلة الكسكاس التبخير اللى بيستخدمها أهل المغرب العربي فى تحضير الكسكسى، واللى تقريبا بتضمن نجاحه وإنه يكون مفلفل.. خالتى حميدة علمتنى طريقة سهلة جدا، وسريعة جدا، ومش محتاجة حلة تبخير والنتيجة بتاعتها مضمونة 100%، وهتخلى كل اللى بيتابعونا فى #جوا_الحلة يتشجعوا ويعملوا الكسكسى فى البيت ويدعولى أنا وخالتى.

كلنا عارفين إن الكسكسى أكلة شعبية فى بلاد المغرب العربى، وهمه مشهورين جدا جدا بيها، بيعملوها مع اللحمة أحيانا، ومع الخضار أحيانا، وبالسكر والقرفة كطبق حلو.. بس مش أهل المغرب العربى بس اللى مشهورين بأكلة الكسكسى، إنما كمان #إيطاليا فى بعض مدنها، مشهورة جدا بأكلة الكسكسى لدرجة إنك لما تزور إيطاليا وتتحرك فى الأحياء الشعبية، تلاقى السيدات الإيطاليات كبيرات السن، بيحضروا الكسكسى بنفس الطريقة اللى بيحضرها بيها أهل المغرب العربى، وبردوب يستخدموا فيها حلة التبخير.لالا النهاردة هنعمل لكم كسكسى بالخضار، والوصفة دى فى المغرب معناها إن لازم يكون فى مع طبق الكسكسى 7 أنواع من الخضار، واحنا هنمشى مع أهل الطريقة ونعمل كسكسى بالسبع خضراوات.

المكونات:

لعمل الكسكسى:

كيلو كسكسى (صُنع فى تُونس)

1/4 ملعقة شاى ملح طعام

3 ملاعق طعام زيت ذزة

ملعقة طعام سمن

3 كوب ماء كبير

لعمل الخضار:

ربع كيلو كوسة

ربع كيلو جزر

ربع كيلو قرع عسل

4 حبات بطاطس (بطاطا)

2 حبات فلفل أخضر

2 حبات فلفل أصفر

4 حبات طماطم (بندورة)

2 مكعب مرقة دجاج

طريقة التحضير (الكسكسى)

يُضع الكسكسى فى وعاء كبير وعميق، ويثرش بالملح والزيت، ثم يُفرك برفق بأطراف الأصابع، حتى يتغلغل الملح والزيت فى جميع حبات الكسكسى.

يُرش الكسكسى بكوب واحد من الماء، ثم يُفرك مرة اخرى بأطراف الأصابع وبرفق شديد، وذلك حتى يتغلغل الماء فى كل حبات الكسكسى، ثم نقوم بتغطية الوعاء، ونتركه لمدة ساعة على الأقل.

بعد مرور الساعة، نرفع الغطاء، ونقوم برش كوب آخر من الماء على الكسكسى، ونفركه جيدا بأطراف الأصابع، ثم نغطى الكسكسى ونتركه لمدة ساعة أخرى.

نكرر رش الماء للمرة الثالثة والخيرة بنفس الطريقة السابقة، ونتركه لمدة ساعة أخرى او ساعتين، ونُلاحظ، فى كل مرة نُضيف فيها الماء ونتركه، أننا نجد ان حبات الكسكسى قد انتفشت وزادت فى حجمها وتضاعفت كميتها، ولهذا، من الضرورى جدا ترك الكسكسى بعد رشه بالماء فترة لا تقل عن الساعة بأى حال من الأحوال.

بعد ذلك، نقوم بإضافة السمن على الكسكسى ونفركه جيدا بأطراف الأصابع، ثم على نار هادئة جدا، نضع الكسكسى على الشياطة، ونُقلبه جيدا بملعقة خشبية، ونضع الغطاء على الوعاء، ونترك الكسكسى حتى يصل للتسوية الكاملة، وتستغرق هذه العملية على النار فترة من 15-20 دقيقة تقريبا.

لتحضير الخضار:

نقوم بغسل جميع الخضراوات غسلا جيدا، ونقوم بتجفيفها بفوطة مطبخ نظيفة.

نقوم بتقطيع الخضراوات على أشكال طولية، ونقوم بتقشير القشرة الخارجية لكل من البطاطس والكوسة والجزر، تمهيدا لسلق جميع الخضراوات.

فى وعاء عميق، نضع حوالى 2 لتر من الماء، ونضع به مكعبات المرقة (يُفضل مرقة الخضار)، ونتركها حتى تصل لدرجة الغليان.

نبدا فى سلق الخضراوات، ونُراعى أن نضع الخضراوات التى تحتاج لوقت أطول فى التسوية قبل غيرها من الخضروات سريعة التسوية، ولهذا نبدأ اولا بوضع قطع الجزر والبطاطس فى الماء، ونتركها فترة 7 دقائق، ثم نقوم بوضع قطع الفلفل الأخضر والأصفر، وبعد حوالى 4 دقائق، نقوم بوضع الكوسة والطماطم والقرع العسل.

بعد فترة لا تتجاوز 7 دقائق من وضع القرع العسل داخل الوعاء، نقوم برفع الوعاء من على النار، ونُصفى المرقة ونضع جميع الخضراوات فى طبق جانبى حتى تبرد قليلا.

بعد ذلك نقوم بوضع الكسكسى فى طبق التقديم، ونُيف إليه الخضراوات المسلوقة، ونضع طبق المرقة كذلك مع أطباق التقديم، ويُقدم مع اللحم المسلوق.

دى طريقة خالتى البسيطة فى تحضير كسكسى مفرفر فى البيت ومن غير حلة تبخير، جربوها وعرفونا رأيكم فيها بمنتهى الصراحة والمصداقية.