البنات والسيدات فى مصر والوطن العربى فعلا شاطرين جدا فى مهارات الطبخ والحلويات بكل أنواعها من الشرق للغرب، وبارعات فى عمل حتى الأصناف الغربية اللى من مطابخ عالمية، مفيش حدا يقدر يقف قدام الست العربية فى حبها للمطبخ وشغل البيت، ومحدش يقدر يقاوم حلاوة وصفاتها أو عمايل ايديها.. ومن الوصفات اللى بتبدع فيها عمل الكيكة.. طعمها طبعا من عمايل ايدينا بيكون أحلى من لو اشتريناها من بره.. والأحلى إن قبل الطعم بيكون فى إحساس رهيب بيدخل قلوبنا قبل ما الكيكة تدخل معدتنا.. هو إحساس الحب والاهتمام من ست البيت سواء كانت الأم أو الأخت أو الابنة أو الزوجة، اهتمامها بإنها تعمل كل حاجة بايديها عشان تسعد كل اللى حواليها!!

النهاردة بنقدم لكم كيكة الفانيليا وجوز الهند، ومين يقدر يقاومها.. سهلة وسريعة، وتتنسف فى الحال.. هنقدم لكم الوصفة بطريقة سهلة تقدرى تنفذيها بنفسك فى البيت بكل سهولة.

طريقة تحضير كيكة الفانيليا وجوز الهند:

المكونات:

٢كوب دقيق

كوب سكر

كوب الا ربع زيت

معلقه صغيرة بيكنج بودر

رشه ملح

٢بيضه
ملعقه كبيرة جوز هند

رشه خل

كوب لبن

كيس فانيليا

طريقة التحضير:

نحضر طبق غويط او في العجان او خلاط
نكسر البيض مع الفانيليا ونضربهم كويس
بالمضرب الكهربائى حوالى عشر دقايق كده
نضيف كوب السكر ونضرب كويس اوى لحد
ما السكر يدوب ننزل بكوباية اللبن ونكمل ضرب  وننزل بالزيت حبه حبه كده ونضرب كمان
وبعدين ننزل الدقيق مع البيكنج بودر والملح والخل ونضرب
جامد لحد ما يبقى قوامها متجانس وكل المكونات تكون اتقلبت
كويس 

ملحوظة:

الخل بيخلى اى كيكه هشه اوى

نحضر صينية مقاس ٢٤ هتبقى عاليه ولو ٢٦ هتبقى
اقل فالارتفاع وندهنها معلقه سمنه ورشه دقيق
والفرن يكون متسخن قبل ما ندخلها على درجة ١٨٠
مئوية وقت التسوية متفتحيش عليها قبل نص ساعه
بس افتحى الفرن نص فاتحه عشان متهبطش
واختبريها بخله سنان.

ملحوظه تانية :

تنفع اوى للتورتة روعه بجد
لما بردت قطعتها وحطيت على الوش جوز هند
والف هنا وشفا يا حلوين.