مين يقدر يقاوم الفراخ المقرمشة؟! أكيد محدش يقدر يقاومها أو يقول مش عاوز آكلها.. هى من الوصفات اللى عليها إجماع من الكبار والصغار، الكل بيحبها وبيطلبها.. حمزة ابن أختى أميرة، عاشق لوصفة الدجاج المقرمش (تشكين ستربس) لدرجة إنه ما شاء الله بيطلبها كل يوم، ولما بتتقدم له، بياكل الطبقة الخارجية المقرمشة الأول، وبعدين يبدأ ياكل الفراخ.. بتبقى لحظة سعادة وفرحة كبيرة جدا بالنسبة لى لما يقولى (شهية جدا يا خالتو) ويقعد يعمل حركات بشفايفه ولسانه تدُل على الاستمتاع بالطعم.. حمزة عندى النهارده فى البيت، وكان لسه من خمس دقايق وأنا ببدأ اكتب الوصفة، بيطلب منى اعمله شرائط الدجاج المقرمش (تشيكن ستربس)، بس أنا فهمته إن النهارده عندنا محشى ولحمة، وبكره إن شاء الله هعمله طلبه، عشان مقدرش اتأخر عنه.

شرائط الدجاج المقرمش (تشكين ستربس) من الوصفات اللى انتشرت من العالم الغربى للعالم العربى بسرعة رهيبة، ولاقت استحسان كبير عندنا فى المنطقة العربية، وهى من الوصفات اللى بتتقدم فى الخارج، كمقبلات أو فواتح شهية، يعنى مسح زور كده على ما الطبق الرئيسى يجهز. طريقة تحضير شرائط الدجاج المقرمش (تشكين ستربس) بتعتمد على عنصرين: نجاح الطبقة الخارجية إنها تكون مقرمشة ولذيذة، وإن الفراخ تستوى كويس من جوا، وتبقى طرية.. يعنى طراوة من القلب، وقرمشة من الخارج، ودى المعادلة اللى هنحققها معاكم إن شاء الله فى طريقة تحضير شرائط الدجاج المقرمش (تشكين ستربس) واللى هنتعرف على مكوناتها حالا مع بعض.

طريقة تحضير شرائح الدجاج المقرمش _ تشكين ستربس

المكونات:

350 جم صدور دجاج مخلية ومقطعة شرائح (شرائط)

للخلطة الداخلية:

كوب لبن رائب

2 بيضة

1 ملعقة صغيرة ملح

1 ملعقة صغيرة فلفل أسود مطحون

1 ملعقة صغيرة شطة حمراء ناعمة (ممكن استبدالها ببريكا فى حالة عدم الرغبة فى الحصول على طعم حار)

للخلطة الخارجية المقرمشة:

كوب دقيق

نصف كوب نشاء ذرة

ملعقة صغيرة ملح

1/4 ملعقة شاى من التوابل الآتية: (فلفل أسود، بودرة بصل، بودرة ثوم، شطة حمراء أو ببريكا، كزبرة جافة)

زيت قلى

طريقة التحضير:

نبدأ فى تحضير خلطة الدجاج "الخلطة الداخلية"، فى طبق عميق نُضيف المكونات الآتية: (اللبن الرائب، 1 ملعقة طعام ملح، 1 ملعقة طعام فلفل أسود مطحون، ملعقة صغيرة شطة حمراء، عدد 2 بيضة)، ونقوم بتقليب جميع المكونات جيدا بمضرب الخفق اليدوى، حتى نحصل على القوام المُتجانس المطلوب.

بعد الانتهاء من تحضير الخلطة الداخلية، نُضيف قطع الدجاج إلى الخلطة ونغلف الطبق جيدا بورق البلاستيك الشفاف، ونترك الدجاج بالخلطة داخل الثلاجة، حوالى 4 - 6 ساعات ليتشرب التتبيلة جيدا، ويمكن إضافة ربع ملعقة شاى من كربونات الصوديوم إلى الخلطة السابقة لتسهيل عملية التسوية.

يتم تجهيز الخلطة الجافة "خلطة القلى المقرمشة"، حيث نقوم بإضافة المكونات التالية لبعضها: (كوب دقيق، نصف كوب نشاء الذرة، ملعقة صغيرة من الملح 1/4 ملعقة صغيرة من الفلفل الأسود المطحون وبودرة البصل وبودرة الثوم، والشطة الحمراء الخشنة)، ونخلط جميع المكونات جيدا.

بعد مرور 4 - 6 ساعات على تتبيل قطع الدجاج فى الخلطة، نستخرج القطع من الثلاجة (البراد)، ونبدأ فى تغطيتها بالخلطة الخارجية المقرمشة، ونُراعى أن يتم توزيع الخلطة على كل أجزاء قطع الدجاج بحيث تغطيها بالكامل.

لمشاهدة الطريقة فيديو على يوتيوب اضغــــط هنـــــــا

فى وعاء مُناسب، نضع زيت القلى على نار متوسطة ونتركه حتى يسخن.

نبدأ بعد ذلك فى إضافة قطع الدجاج إلى زيت القلى الساخن، ونُراعى أن نقوم بتهدئة درجة الحرارة قبل وضع قطع الدجاج.

تأخذ القطعة حوالى 7-10 دقائق فى زيت القلى لتصل لمرحلة التسوية، ويجب ألا نُخرج قطع الدجاج من الزيت بمجرد تغير لون الطبقة الخارجية للون الذهبى البنى، لأن لون الطبقة الخارجية يتحول سريعا للون الذهبى البنى، قبل وصول لحم الدجاج من الداخل إلى التسوية الكاملة.

نستخرج قطع الدجاج، ونضعها على ورق المطبخ لنتخلص من الزيت الزائد، ثم نُقدمها مع الكاتشاب والبطاطس المقلية.

الوصفة بتاعتنا أحلى من المحلات، ومن الأصابع نصف المقلية اللى بتتباع جاهزة، جربوها وادعولنا.