طريقة عمل الشكشوكة المصرية - شكشوكة بالبيض 

كتير بتعدى علينا أوقات بنحتار فيها نعمل إيه عشان ناكله، وبتكون الحيرة كبيرة لما تبقى قدامنا المكونات ومش عارفين نستخدمها غير بالطريقة التقليدية جدا، ووجبة الفطار من الوجبات اللى الحيرة بتزيد فيها جدا جدا، خصوصا وهى مرتبطة بالخروج الصبح للشغل أو المدرسة أو الجامعة، وكتير مننا بيهمل وجبة الفطار تماما، وده بيأثر على الصحة بالسلب، وكتير بيفطر فى الشارع عشان معندوش أو معندهاش وقت.. ومن المكونات الأساسية اللى بتدخل فى وجبة الفطار، البيض، وتلاقى أغلب الستات تعمله بشكل تقليدى، يعنى بيض مسلوق، أو أومليت، أو مخربط سادة أو مع البسطرمة، وساعات بيض عيون، وتنتهى تقريبا قصة البيض فى وجبة الفطار أو العشاء عند الطرق التقليدية، لكن البيض ممكن يتعمل بطرق تانية كتير مشهية جدا وتفتح النفس من قبل ما تتشاف حتى، أيوه بمجرد ما نشم ريحة الوصفة الرائعة اللى البيض داخل فيها، تبدأ المعدة تحس بمتعة البحث عن الرائحة الزكية، وده بالظبط اللى بيحصل فى وصفتنا لطبق الشكشوكة الخطير بطريقتنا السهلة والمميزة جدا فى جوا الحلة.

الشكشوكة اتعرفت كوجبة فطار فى دول شمال إفريقيا، ومنتشرة جدا بردو فى فلسطين وسوريا، وهناك بيسموها أسماء مختلفة زى "قلاية البندورة بالبيض"، و"الجظ مظ"، وبيُقال إن الشكشوكة وصفة مصرية أصيلة اتعرفت على ضفاف النيل وانتشرت من مصر فى كل دول شمال إفريقيا مع بعض التغييرات فى المكونات. والشكشوكة اتعرفت فى بلاد الأندلس من 500 سنة فاتوا، ومكوناتها الأساسية البيض والبصل والطماطم (البندورة)، وانتشرت وصفة الشكشوكة فى كل دول العالم، اللى بيقدموها فى مطاعمهم لأن عليها إقبال كبير، خصوصا مع إضافة الفلفل الحار عليها، اللى بيدى طاقة خصوصا لسكان البلاد الباردة. 

تعالوا بقى نتعرف على فوايد البيض الغذائية للجسم عشان نستفيد أكتر منه ونبقى عرفنا معلومات عن المكون الأساسى فى وصفة الشكشوكة المصرية

فوائد البيض:

البيض غنيّ بفيتامين ب12، والحديد، والكالسيوم، وهى عناصر أساسية جدا فى بناء الجسم، وتمنع من الإصابة بفقر الدم. يساعد على زيادة التمثيل الغذائى فى الجسم وحرق السعرات الحرارية. يُنظم إفرازات الغدة الدرقية مع اليود، لاحتوائه على كمية عالية من السيلينيوم. يبنى البيض العظام والأسنان ويقويها وذلك لاحتوائه على نسبة عالية من الكالسيوم والبروتينات والفوسفور. يحتوى البيض على فيتامين ى الذى يقوى الرؤية ويحافظ على سلامة العين. يدعم نشاط الغُدة الكظرية المسئولة عن إفراز الهرمونات المقاومة للشعور بالإجهاد.

 وبما إن فوايد البيض كتيرة جدا، واحنا ذكرنا جزء بسيط منها، فضرورى دلوقتى نهتم بتناول البيض فى أكلنا ونخليه جزء أساسى فى وصفاتنا وده اللى هنعمله مع بعض حالا فى وصفتنا المميزة جدا للشكشوكة، بس يا ريت نراعى إن مرضى الضغط، والناس اللى نسبة الكوليسترول عالية عندهم يقللوا من تناول البيض فى أكلهم.

طريقة عمل الشكشوكة المصرية - شكشوكة بالبيض 

المكونات لعمل الشكشوكة المصرية:

3 حبات بيض طازج

2 حبة طماطم (بندورة)

1 حبة بصل صغيرة

2 حبة فلفل رومى (فلفل أخضر)

1 حبة فلفل أحمر حار(حسب الرغبة)

3 فصوص ثوم

كمون حصى أو كمون عادى، ملح، فلفل أسود

2 ملعقة طعام زيت زيتون

كزبرة خضراء طازجة (للتزيين)

 حبة بصل أخضر(للتزيين)

طريقة عمل الشكشوكة المصرية - شكشوكة بالبيض

نضع مقلاة على نار متوسطة ونتركها دقيقتين حتى تسخن، ثم نقوم بإضافة زيت الزيتون للمقلاة.

نقوم بتقطيع البصل إلى شرائح صغيرة، ونضعه فى المقلاة، ثم نقوم بتقطيع الفلفل الرومى الأخضر إلى مكعبات صغيرة الحجم ونُضيفها إلى البصل ونُقلب جيدا حتى تُصبح المكونات طرية نسبيا. ثم نغطى الطاسة من دقيقتين إلى ثلاث دقائق على نار هادئة. 

نقوم بعد ذلك بتقطيع الثوم إلى شرائح صغيرة، وكذلك نقوم بتقطيع الفلفل الأحمر الحار إلى شرائح صغيرة، ونُضيفهم جميعا إلى المكونات السابقة ونُقلب جيدا.

نقوم بتقطيع الطماطم إلى مكعبات صغيرة ومتساوية فى الحجم، ونُضيفها إلى المكونات السابقة، ثم نقوم بإضافة الملح والفلفل الأسود المطحون والكمون، ونقوم بتقليب جميع المكونات السابقة جيدا مع بعضها البعض، حتى تُصبح جميع المكونات وخصوصا الطماطم طرية.
ثم نغطى الطاسة على جميع مكونات الخضارمن دقيقتين إلى ثلاث دقائق على نار هادئة. 

نبدأ باستخدام الملعقة، فى عمل فراغات على شكل دوائر داخل الطاسة، ثم نقوم بفقش البيض داخل تلك الدوائر، ونرش عليه القليل جدا من الملح والفلفل، ثم نقوم بتغطية المقلاة بغطاء مُناسب لمُدة 3-4 دقائق، ونُخفض درجة حرارة البوتاجاز إلى حرارة ضعيفة، وذلك لضمان تسوية بياض البيض بطريقة كاملة وصحية.

نقوم بعد ذلك برفع الغطاء عن المقلاة، ثم نبدأ فى تزيين الشكشوكة، وإضافة طعم مميز جديد لمكوناتها، وذلك بتقطيع البصل الأخضر والكزبرة الخضراء إلى شرائح صغيرة ودقيقة الحجم وإضافتها على المكونات الموجودة بالمقلاة.تُقدم الشكشوكة فى المقلاة، لتُعطى إحساسا لا يُقاوم بالمتعة، والرائحة الزكية.

كدة نبقى خلصنا مع بعض طريقة عمل الشكشوكة المصرية - شكشوكة بالبيض ، أظن مفيش أسهل ولا أروع من كدة طريقة للشكشوكة. 
الشكشوكة طعمها جامد وخفيف على المعدة بس الشكشوكة بطريقتنا مش الشكشوكة المتلخبطة على بعضها. 

لو عايزين كمان تشوفوا طريقة عمل الشكشوكة المصرية - شكشوكة بالبيض اضغطوا على >>> الرابط ده  

ما رأيكم؟ دام فضلكم! عجبتكوا يعنى والا إيه؟ أنا متأكدة إنها إن شاء الله هتعجبكوا جدا، واللى مكنش بيحب ياكل الشكشوكة يعمل وصفتنا عشان من بعدها هيحبها.