الميزانية رايحة على أكل المطاعم، عشان الوصفات اللى بتحبوها فى المطاعم مش بتعرفوا تعملوها فى البيت؟! مراتك مش بتعرف تعمل أكل فى البيت زى اللى بيعجبك بره؟! كل الكلام ده فاكس مع جوا الحلة.. عشان احنا بنعرف منكم الأصناف اللى بتحبوها فى المطاعم العالمية والمحلية المشهورة، وبنجيب لكم أسهل وأحسن طريقة لتحضيرها فى البيت، بمكونات متاحة، وبسهولة فائقة، وفوق كل ده بطعم لذيذ جدا، وساعات كتيرة بيبقى أحلى من طعم المطاعم اللى بتاكلوا فيها بره البيت، وتحدى!!

من الوصفات اللى عدد كبيرة من الناس بيقبل عليها فى أكل المطاعم، وبيحبها الأطفال والكبار، وصفات أجنحة الفراخ، بالنسبة لى فكرة استخدام أجنحة الفراخ فى وصفة كمقبلات، أو وجبة تصبيرة أو وجبة سريعة للأطفال، من الوصفات الهايلة، أنا مكنتش أعرف تأثيرها عظيم النجاح خصوصا مع الأطفال غير لما شفت نتيجة ده مع حمزة ابن أختى أميرة. احنا عندنا اليوم العائلى زى أغلب الأسر المصرية هو يوم الجمعة، الكل بيتجمع فى بيت الأب والأم على وجبة الغدا، والكل بيستنى ياكل فى بيت أهله شوقا وحنانا للحظات اللامسوؤلية من ناحية، وعشقا فى أكل الأم من ناحية تانية، حتى لو كانت الزوجة لهلوبة فى شغل المطبخ. فى اليوم ده أنا اللى بقوم بدور ماما فى الطبخ، جزاها الله عنا كل خير ياما تعبت وياما وقفت وياما وضبت وعزمت، بس ربنا يديها الصحة مبقتش تقدر، المهم كل جمعة بحاول أقدم على الأقل صنف جديد على سفرة العيلة، حتى بيكون بالنسبة لى أول مرة أعمله، ومن المرات اللى قررت أعمل فيها كده، كنت محضرة أجنحة دجاج بصوص الترياكى، صوص يابانى لذيذ جدا، بيستخدموه مع اللحوم والأسماك والدواجن بكل أنواعها وفى كل وصفة.. وأثناء ما أنا بحضر الوصفة دى وواقفة بحمر أجنحة الفراخ فى المطبخ، دخل عليا حمزة ابن أختى وقالى: "أنا ممكن آخد واحدة من دول؟" يقصد الأجنحة المتحمرة، طبعا قلت له أيوه، واحدة فى واحدة، حمزة بالهنا والشفا خلص نص الكمية المتحمرة قبل حتى ما أحط عليها الصوص، وبعد الصوص على سفرة الغدا، قام بالباقى بمنتهى السعادة والإقبال على الوصفة.

مهم جدا إننا كستات نعرف ونراقب ونلاحظ، أهل بيتنا بيحبوا إيه فى الأكل الجديد اللى بنعمله، الأطفال فى سن صغيرة يمكن ميعرفوش يعبروا بلسانهم عن ده، لكن ملاحظة الأم لطريقة إقبالهم على صنف أكتر من التانى بتكون كافية جدا لأنها تعرف ده وتحاول تقدمه بأكتر من طريقة عشان تفتح نفسهم دايما على الأكل، ومهم كمان إننا يكون عندنا الثقة فى نفسنا كستات وبنات إننا نقدر نعمل فى البيت أكل أحلى بكتير من اللى بيتقدم فى المطاعم، أكل يكون كفيل بإنه يخليى حبايبنا وأولادنا وأزواجنا يعشقوا أكل البيت وميفكروش يطلبوا حاجة من بره. تعالوا معايا نروح بسرعة ونتعرف على مكونات وصفة أجنحة الدجاج بصوص الترياكى اليابانى الجميل.

المكونات:

نصف كيلو أجنحة دجاج

2 كوب دقيق

1 ملعقة طعام ملح

1 ملعقة شاى فلفل أسود مطحون

ملعقة شاى ببريكا

1/2 لتر زيت قلى

لصوص الترياكى:

5 ملاعق طعام صويا صوص

2 ملعقة طعام عسل نحل

1/2 كوب عصير برتقال طازج

1 ملعقة شاى زيت السمسم وملعقة طعام زيت زيتون (أو 2 ملعقة طعام زيت الزيتون إن لم يتوفر زيت السمسم)

1 فص ثوم مفروم

1/4 ملعقة شاى زنجبيل طازج مفروم

ملعقة طعام سمسم حبوب مُحمص

طريقة تحضير أجنحة الدجاج بصوص الترياكى

يتم تقطيع الأجنحة بحيث نعمل على إزالة طرفها السفلى المدبب وذلك باستخدام سكين حاد.

يتم غسل الأجنحة جيدا بالماء والخل، ثم تشطف جيدا ويبدأ تجهيزها للتتبيل.

فى طبق عميق نُضيف المكونات الآتية: (2 كوب دقيق، ملح، فلفل أسود مطحون، ببريكا، شطة حمراء)، ونقوم بتقليب جميع المكونات جيدا بملعقة خشبية، ثم نُضيف أجنحة الدجاج إلى المكونات، ونُقلبها جيدا حتى تكتسى كل أجزاء الأجنحة بالدقيق المُتَبّل.

فى وعاء عميق، نضع زيت القلى على نار متوسطة ونتركه حتى يسخن.

نبدأ بعد ذلك فى إضافة قطع أجنحة الدجاج إلى زيت القلى الساخن، ونُراعى أن نقوم بتهدئة درجة الحرارة قبل وضع الأجنحة، كما نُراعى كذلك أن يغمر الزيت الأجنحة داخل الوعاء حتى لا نضطر لتحريك القطع كثيرا داخل الزيت، مما يسبب تفكك الخلطة الخارجية.

تأخذ القطعة حوالى من 5-10 دقائق فى زيت القلى لتصل لمرحلة التسوية، ويجب ألا نُخرج قطع الأجنحة من الزيت بمجرد تغير لون الطبقة الخارجية للون الذهبى البنى، لأن لون الطبقة الخارجية يتحول سريعا للون الذهبى البنى، قبل وصول لحم الدجاج من الداخل إلى التسوية الكاملة. نستخرج قطع الأجنحة، ونضعها على ورق المطبخ لنتخلص من الزيت الزائد.

تحضير صوص الترياكى

فى وعاء عميق ساخن، نضع زيت السمسم وزيت الزيتون، ثم نُضيف الزنجبيل والثوم المفروم، ونُقلب جيدا حتى تُصبح المكونات ذهبية اللون.

نُضيف جميع السوائل إلى الوعاء، وهى الصويا صوص، عصير البرتقال، العسل الأبيض، ونُقلب جميع المكونات جيدا، لمدة دقيقة ثم نقوم بخفض درجة الحرارة لأقصى درجة، ونترك المكونات على النار حتى تأخذ السُمك المطلوب، وذلك مع المتابعة والتقليب المستمر، حيث تأخذ هذه الخطوة حوالى 10 إلى 15 دقيقة.

بعد وصول الصوص للسمك المطلوب نقوم بإضافة حبوب السمسم لمُحمص، ثم فى طبق تقديم مُناسب، نضع الأجنحة التى تم تحضيرها، ثم نقوم بسكب صوص الترياكى عليها بحيث يغطيها بالكامل من كافة الجوانب، ويُمكن تزيين الطبق بشرائح دائرية من البصل الأخضر.

يا رب تكون وصفتنا سهلة ودمها خفيف، جربوها فى البيت وحاولوا تراعوا إنكم لما تعملوها تبقى هتتاكل فورا وفى وقتها عشان ده بيفرق جدا فى الإحساس بالطعم خصوصا مع صوص الترياكى، الوصفة دى كمان حلوة جدا كوجبة سريعة "سناك" لأطفالكم وهمه لسه راجعين من المدرسة، وحلوة جدا كطبق أول starter على سفرة الغدا خصوصا لو فى عزومة.