بيقولوا إن فى أكل شعبى، أو بمعنى أصعب "أكل للفقرا"!! الوصف ده للأكل اللى تكلفته بصفة عامة قليلة جدا جدا، عشان يقدر عليها محدودى الدخل، والناس اللى بتلاقى أكلها يوم ويومين تلاتة متلاقيش.. وفى ظل غلاء الأسعار وازدياد تمن السلع المستمر، وخصوصا اللحوم والدواجن، شفنا إنه من الضرورى نقدم باستمرار وصفات تكلفتها منخفضة، وبالرغم من كده جميلة ومشبعة، ومن الوصفات دى، إننا نستخدم أجنحة الفراخ فى عمل وجبة خفيفة ممكن تشبع أطفالنا، أو تشبعنا احنا حتى كأشخاص كبار، ومتبقاش طعمها سخيف، لأننا هنعملها بصوص لذيذ جدا وهنحصر الصوص ده بنفسنا فى البيت عشان يكون أجمل وأوفر، الصوص ده بيستخدموا الناس كتير جدا خصوصا فى حفلات الشواء، عرفتوه؟ صوص الباربيكيو.

عاوزين نعلم نفسنا، ونعلم ولادنا وبناتنا، إننا مينفعش نرمى أكل فى سهلة المهملات، وإن اللقمة اللى بنستهون بيها ونسترخصها ونرميها، غيرنا كتير من البشر مش لاقيها، عاوزين نزرع فى أولادنا قيمة قدسية لُقمة العيش كنعمة وزرق عظيم ربنا بيوهبه لينا، وكفضل ممكن لما نُحسن استخدامه يكون سبب فى إشباع بطون كتير جعانة ومش لاقية.. عاوزين نعرف إن حاجة بسيطة ورخيصة زى أجنحة الفراخ، ممكن تكون أمل كبير لشخص محروم من الغذا، ومحروم من كسب لقمة عيشه بنفسه، لأى أسباب زى المرض لا قدر الله، يا ريت واحنا بنقرا الوصفة ونقرا الكلام ده، فعلا ناخد خطوة فى بيوتنا ومطابخنا نخلينا أقل إهدارا للطعام، وأكثر استخداما ليه بشكل ينفع الفقير والمحتاج، ويخلينا احنا نفسنا شعوب اقتصادية فى أكلها وشربها.

المكونات:

نصف كيلو أجنحة دجاج

2 كوب دقيق

1 ملعقة طعام ملح

1 ملعقة شاى فلفل أسود مطحون

ملعقة شاى ببريكا

1/2 لتر زيت قلى

لصوص الباربيكيو:

1 ملعقة طعام فلفل أحمر حار خشن

1 ملعقة طعام ببريكا

1 ملعقة شاى كركم بودرة

1 ملعقة شاى كمون مطحون

1/4  ملعقة شاى ثوم بودرة

1/4 كوب سكر بنى أو أبيض

1 كوب كاتشاب

1/4 كوب خل التفاح

1/4 كوب ماء صنبور

2 ملعقة طعام عسل أسود

1 ملعقة طعام ويرشيستر صوص

1 ملعقة شاى عجينة ثوم

1 ملعقة شاى فلفل أسود مطحون

طريقة تحضير أجنحة الدجاج بصوص الباربيكيو

يتم تقطيع الأجنحة بحيث نعمل على إزالة طرفها السفلى المدبب وذلك باستخدام سكين حاد.

يتم غسل الأجنحة جيدا بالماء والخل، ثم تشطف جيدا ويبدأ تجهيزها للتتبيل.

فى طبق عميق نُضيف المكونات الآتية: (2 كوب دقيق، ملح، فلفل أسود مطحون، ببريكا، شطة حمراء)، ونقوم بتقليب جميع المكونات جيدا بملعقة خشبية، ثم نُضيف أجنحة الدجاج إلى المكونات، ونُقلبها جيدا حتى تكتسى كل أجزاء الأجنحة بالدقيق المُتَبّل.

فى وعاء عميق، نضع زيت القلى على نار متوسطة ونتركه حتى يسخن.

نبدأ بعد ذلك فى إضافة قطع أجنحة الدجاج إلى زيت القلى الساخن، ونُراعى أن نقوم بتهدئة درجة الحرارة قبل وضع الأجنحة، كما نُراعى كذلك أن يغمر الزيت الأجنحة داخل الوعاء حتى لا نضطر لتحريك القطع كثيرا داخل الزيت، مما يسبب تفكك الخلطة الخارجية.

تأخذ القطعة حوالى من 5-10 دقائق فى زيت القلى لتصل لمرحلة التسوية، ويجب ألا نُخرج قطع الأجنحة من الزيت بمجرد تغير لون الطبقة الخارجية للون الذهبى البنى، لأن لون الطبقة الخارجية يتحول سريعا للون الذهبى البنى، قبل وصول لحم الدجاج من الداخل إلى التسوية الكاملة. نستخرج قطع الأجنحة، ونضعها على ورق المطبخ لنتخلص من الزيت الزائد.

تحضير صوص الباربيكيو

فى وعاء عميق، نضع الكاتشاب ثم خل التفاح، والماء والسكر والعسل، ثم نقوم بوضع باقى مكونات الصوص من التوابل والثوم وغيرها.

بواسطة مضرب خفق يديوى، نقوم بخلط جميع المكونات مع بعضها البعض، حتى تمتزج تماما.

على نار هادئة، نضع الوعاء ونُقلب جميع المكونات جيدا، ونترك المكونات على النار حتى تأخذ السُمك المطلوب، وذلك مع المتابعة والتقليب المستمرين، ويُراعى عدم التوقف عن التقليب أو ترك الوعاء، وذلك حتى لا يحترق الصوص. تأخذ هذه الخطوة حوالى 15 إلى 25 دقيقة.

بعد وصول الصوص للسمك المطلوب يُرفع من على النار ويُترك ليبرد.

فى طبق تقديم مُناسب، نضع الأجنحة التى تم تحضيرها، ثم نقوم بسكب صوص الباربيكيو عليها بحيث يغطيها بالكامل من كافة الجوانب، ويُقدم.

يا رب تكون وصفتنا سهلة ودمها خفيف، جربوها فى البيت وحاولوا تراعوا إنكم لما تعملوها تبقى هتتاكل فورا وفى وقتها عشان ده بيفرق جدا فى الإحساس بالطعم خصوصا مع صوص الباربيكيو.. منتظرين نعرف رأيكم فى الوصفة ونشوف صورها، اكتبولنا تعليقاتكم على موقعنا وعلى صفحتنا على الفيسبوك.