طريقة تحضير دجاج مشوى بالطريقة الإفريقية - بيرى بيرى


عمركوا حسيتوا إن المطبخ عبارة عن غرفة ضيقة جدا مش بتاخد غير فرد واحد؟! كان بيجيلى الإحساس ده كتير زمان لما كان كل الأكل اللى باكله فى البيت محصور فى صنفين تلاتة فى كل وجبة، همه همه، مفيش تغيير، مفيش تجديد. لما حبيت أتخلص من الإحساس ده، لأنه بصراحة كان بشع، قررت أتغير، أتعلم بنفسى الطبيخ، وأتعلم مهاراته، وأثقف نفسى كويس فيه، بالاطلاع على مطابخ مختلفة غير مطبخنا الشرقى الجميل والثرى بوصفاته، وابتديت ولما ابتديت شرخت، خدت جولة مع نفسى حول الوصفات العالمية، واستوقفتنى وصفة للفراخ المشوية من المطبخ الإفريقى، هى وصفة دجاج البيرى بيرى، الفراخ المشوية بصوص الفلفل الحار جدا.

 

صوص البيرى بيرى فى الأصل برتغالى، وهو معناه فى اللغة الساحلية (فلفل.. فلفل) يعنى باللغة الإنجليزية pepper pepper، وده لأن المكون الأساسى والرئيسى فيه هو الفلفل الأحمر الحار، والصوص ده انتشر جدا فى دول وسط وجنوب إفريقيا، لأن زراعة الفلفل الأحمر الحار بتكتر جدا فى الدول دى، وده ساعد على انتشار وصفة البيرى بيرى، ومن الدول الإفريقية اللى مشهورة جدا بوصفة الفراخ بصوص الفلفل الحار، الكونغو ومالاوى، وهناك بينطقوا الصوص بطريقة مختلفة بيقولوا عليه peli peli، أما فى زامبيا وغانا ونيجيريا وجنوب إفريقيا وزيمبابوى وموزمبيق، فكل الدول دى بتنمو فيها أشجار الفلفل الأحمر الحار بكثافة، وهناك بتشتهر وصفة الفراخ الحارة وبتشتهر بكلمة peri peri، يعنى فلفل فلفل. فى قاموس Oxford اللغوى، كتب لفظ بيرى بيرى بالحروف دى piri piri وعرفه على إنه صوص حار جدا جدا، مصنوع من الفلفل الأحمر الحار، وأرجع القاموس التسمية دى لدولة موزمبيق.

الوصفة دى بالرغم من إن الصوص بتاعها حار جدا، لنه معتمد بشكل كبير فى مكوناته على الفلفل الحمر الحار، إلا إنها جميلة، ليها رونقها الخاص جدا، والناس اللى بتحب الكل الحار والمشطشط، هتبقى الوصفة دى بالنسبة لهم مثالية فى كل حاجة. وتعتبر وصفة الفراخ بصوص البيرى بيرى من الوصفات الإفريقية اللى منتشرة فى البلاد اللى ذكرناها من شوية، وهناك بيعملوا مشوية على الفحم وبتطلع من الشواية على الأكل مباشرة.

الفلفل الأحمر الحار ده، معروف فى الدول الإفريقية اللى بتزرعه باسم "فلفل عين الطائر الإفريقى"، وبيستخدمه الأفارقة فى وصفات تانية كتير، هنبقى نستعرض بعضها عندنا هنا فى المدونة فى موضوعات جديدة عشان ننوع فى طرق الأكل ونكسر حاجز الغرفة الضيقة. تعالوا بينا نطير على وسط إفريقيا ونشوف بيعملوا الفراخ الحارة دى ازاى.

 

المكونات دجاج البيرى بيرى:

دجاجة مقطعة إلى 6 أو 8 أجزاء

10 حبات فلفل أحمر حار

4 ورقات ورق لورا مجفف

10 فصوص ثوم

1 ملعقة طعام ملح

1 ملعقة شاى فلفل أسود مطحون

1 ملعقة شاى ببريكا

4 ملاعق طعام زيت زيتون

 

طريقة التحضير

 

 تحضير صوص البيرى بيرى

 

فى خلاط، نقوم بوضع المكونات السابقة جميعا مع بعضها البعض، ما عدا قطع الدجاج طبعا، ونقوم بضرب المكونات جميعا فى الخلاط حتى نحصل على عجينة مُناسبة وجميع مكوناتها مُختلطة ومتجانسة تماما مع بعضها البعض.

بعد الانتهاء من تحضير خلطة الصوص، نقوم بوضعها فى إناء واسع وعميق، ثم نبدأ فى عمل قطع صغيرة بالسكين فى كل قطعة من قطع الدجاج، وذلك للعمل على تغلغل الصوص فى قطع الدجاج من ناحية، ومن ناحية أخرى لتسهيل عملية التسوية أثناء الشوى.

يتم غمر قطع الدجاج فى صوص البيرى البيرى الذى سبق وقُمنا بإعداده، ويجب التأكد من تغطية جميع قطع الدجاج من جميع الجوانب بالصوص، ونتركها مثدة لا تقل عن ساعة فى تتبيلة صوص البيرى بيرى حتى تتشربه قطع الدجاج تماما.

فى حالة عدم توفر فرصة للشواء على الفحم، نقوم بوضع 4 قطع من الفحم على شعلة البوتاجاز ونتركها حتى تحمر، ثم نقوم بوضعها فى طبق معدنى صغير به ورقة قصدير "فويل" ونضعها فى نفس الوعاء العميق الذى يحتوى على قطع الدجاج المغمورة فى صوص البيرى بيرى، ثم نقوم بوضع نقط من زيت الذرة على قطع الفحم المشتعل، حتى نحصل على مذاق الشواء فى التتبيلة، ونقوم بتغطية الطبق بورق القصدير بإحكام، او بغطاء مُناسب إن وجد، ونتركها مُدة لا تقل عن نصف ساعة حتى تتغلغل رائحة الفحم فى قطع الدجاج بالكامل.

نبدأ بعد ذلك فى شوى قطع الدجاج فى مقلاة الشوى، ونُراعى أن تكون مقلاة الشوى ساخنة وعلى نار متوسطة، نقوم بوضع قطع الدجاج المتبل على مقلاة الشوى، ونُقلبها على جميع الجوانب حتى تصل للتسوية الكاملة.

تستغرق عملية التسوية حوالى من10 دقائق إلى 15 دقيقة، نستخرج قطع الدجاج، ونضعها فى طبق تقديم مناسب ونقوم بتزيينها بالكزبرة الخضراء المٌقطعة بشكل رفيع ومتناسق.

يا رب تجربوا وصفتنا، بجد تستاهل المحاولة، ولو انتوا من عشاق الكل الحار، تبقى الوصفة دى لايقة عليكم خالص، يا ريت لو نفذتوا الوصفة تقولوا لنا رأيكم فيها بصراحة على المدونة او صفحتنا على الفيسبوك، ومتعونا بصورها كمان.