الخبز أو لقمة العيش.. الجملة الصغيرة جدا اللى بنستخدمها عشان نعبر عن الرزق أو كسب الرزق، بنحطها كمصريين فى كل الكلام اللى بيدل على المكسب، تلاقينا نقول "بيجرى ورا أكل عيشه، أكل العيش يحب الخفية، كُل عيش" وكلها جمل تحفيزية للسعى على الكسب الحلال، وكأننا بنوثق العلاقة بين الخبز أو العيش اللى بيدخل المعدة بين الفلوس اللى بتكون سبب فى حصولنا على العيش ده وأكلنا ليه.

النهاردة وصفتنا مصرية 100% وهى البريوش أو الشوريك المصرى، نوع من أنواع الخبيز اللى بيقبل عليها المصريين جدا وبيعملوها طول السنة، بالرغم من إن شهرتها مرتبطة جدا بالاحتفال بأعياد الربيع فى مصر، يعنى تلاقى البيوت المصرية أغلبها بيخبز البريوش عشان ياكله فى خروجة حلوة فى جنينة جميلة أو على نهر النيل يوم اجازة شم النسيم، هو طريقة تحضيره سهلة ومكوناته بسيطة ومش مكلفة وده بيسهل علينا كتير ويشجعنا نعمله فى البيت.

أنواع الخُبز كتيرة جدا، وفى كل بلد نلاقى شُهرة واسعة لنوع العيش أو الخبز اللى البلد دى مشهورة بيه، زى خبز الأرز اللى مشهورة بيه اليابان، وخبز التفتان المشهورة بيه إيران، وخبز رومالى روتى فى الهند الشرقية، وغيرها أنواع كتيرة من الخُبز تقدروا تتعرفوا عليها اكتر من خلال الرابط ده

البريوش عيش مخمر، وبيتعمل بأشكال كتير حلوة أشهرها المضفر والحلزونى، وممكن جدا يتحط عليه سكر وزبيب عشان يديله قيمة اكبر، زى وصفتنا اللى هنقدمها لكم النهاردة.. تعالوا نتعرف على مكونات وطريقة تحضير البريوش.

طريقة تحضير البريوش.

المكونات:

نصف كيلو دقيق

نصف كوب سُكر

نصف كوب زبدة "بدرجة حرارة الغرفة"

2 بيضة

2 ملعقة كبيرة لبن بودرة

كوب لبن دافئ للعجن "حسب الحاجة"

ذره ملح

للتخمير:

ملعقة كبيرة خميرة جافة

2  معلقة سكر

معلقة دقيق

ماء دافئ للعجن

للوجه: 

بيضة .. فانيليا .. سكر .. حبة البركة .. زبيب

طريقة التحضير.

في بولة هانخلط الخميرة والسكر والدقيق بقليل من الماء الدافئ ونتركه حتى يخمر 

والمرحلة دي بتساعد على سرعة التخمير وبتعمل عمل المحسن.

في طبق العجن نخلط الدقيق والزبدة والسكر واللبن البودرة  وذرة الملح والبيض وشوية فانيليا ونضيف عليه خليط الخميرة السابق ونعجن باللبن الدافئ على حسب ما تاخد العجينة لحد ما تطلع من الطبق.

نتركها تخمر حوالي ساعة أو ساعتين، ونشكلها ونتركها تخمر مرة أخرى حوالي نص ساعة ثم ندهن الوجه بالبيضة ونرش عليها سكر أو حبة البركة أو سمسم على حسب الرغبة.

نُدخل البريوش في فرن سابق التسخين على درجة 200°م، مُدة من 35 لـــ40 دقيقة أو على حسب ما يتم التسوية في فرنك.

و بالهنا و الشفا .

لو حابين تتعرفوا أكتر على خطوات تحضير البريوش بالتفصيل، مع الصور اللى بتوضح الخطوات اضغطوا على الرابط ده.