عندى فى البيت أختى إسراء حرفيا كييفة شوربة، الشوربة بالنسبة لها وجبة، تنفع تتاخد فى أى وقت فى اليوم، وفى أى فصل من فصول السنة.. لو كانت الشوربة موجودة على الغداء أو العشاء يبقى بالنسبة لها جبرت 

عندى كمان أخويا الكبير بيعشق الشوربة، لدرجة إنه بيزعل لما بيكون بيزورنا واسأله: "أغرف لك شوربة؟!"، مرة سألته السؤال ده رد عليا وقالى: "أنا راجل شوربجى أصلا.. عيب تسألينى سؤال زى ده تانى" J ومن ساعتها ومصطلح شوربجى عندنا فى البيت معناه الشخص اللى بيحب الشوربة موووووووووووووووت.

من كتر حب إسراء أختى وأنس أخويا الكبير للشوربة بقيت أحب أدور على أصناف جديدة وطرق جديدة لعمل الشوربة، غير الطرق التقليدية اللى كل أمهاتنا علمتها لنا.. لاقيت وأنا بدور عالم الشوربة ده واسع وملوش آخر، مليان بالوصفات والطرق والألوان، تلاقى شوربة البروكلى مثلا لونها أخضر، وشوربة الطماطم لونها أحمر، أما شوربة العدس فطبعا ذات لون أصفر 

حبيت الموضوع أوى على رأى محمد هنيدي، واهتميت بوجود طبق الشوربة بشكل دائم على سفرة الغداء، وفى رمضان بيكون طبق الشوربة أساسى وضرورى على سفرة الفطار، عشان يدفى المعدة قبل ما تبدأ تستقبل الأكل المتنوع الدسم.

طبق الشوربة فى كتير من الأحيان بيكون وجبة، أو بمعنى أدق بلغتنا احنا المصريين #تصبيرة، حاجة كده تصبر بها بطنك وتسد بيها جوعك على ما يبقى فى وجبة متكاملة الأركان 

الشوربة كمان بتكون كمون أساسى فى كتير من الوصفات، يعنى بنات وستات كتير بتعمل طبق الخضار بالشوربة، والملوخية عايزة شوربة، حتى حلة الأرز عايزة شوربة، الشوربة يا جماعة #جوكر_المطبخ.

طبقنا النهاردة نوع تقليدى جدا ومحبوب جدا للكبار والصغار، شوربة لسان العصفور Bird Tongue Soup  ، سهلة جدا فى طريقة تحضيرها ومش بتاخد وقت ولا مجهود.

شوربة لسان العصفور بتتعمل بنوع مشهور جدا من المكرونة الإيطالية المعروفة باسم Orzo Pasta، الحباية بتاعتها بتكون شبه حباية الأرز المصرى بس كبيرة شوية عنها، وفى إيطاليا كلمة Orzo معناها بالعربى "الشعير"، وهنلاقى إن فى تسميات كتير غير تسمية Orzo، ومن أشهر التسميات دى فى إيطاليا Rosa Marina.

شوربة لسان العصفور مشهورة جدا جدا فى اليونان، وكمان فى أغلب دول البحر المتوسط ومن بينهم مصر طبعا، وفى مناطق متعددة فى ألمانيا.

تعالوا معانا نتعرف على مكونات شوربة لسان العصفور وطريقة تحضيرها على طريقة مامتى ومامتك.

طريقة عمل شوربة لسان العصفور

المكونات:

200 جرام من لسان العصفور

لتر ونصف شوربة دجاج أو لحم

2 مكعب مرقة دجاج "فى حالة عدم توفر الشوربة"

1/2 ملعقة شاى فلفل أسود مطحون

2 ملعقة طعام زيت زيتون

طريقة التحضير:

نضع  وعاء عميق على نار متوسطة حتى يسخن.

نُضيف زيت الزيتون للوعاء بعد أن يُصبح ساخنًا.

نضع كمية لسان العصفور فى الوعاء الساخن المُحتوى على زيت الزيتون، ونُقلبه جيدا حتى يصل إلى اللون الذهبى البنى.

نُضيف شوربة الدجاج أو اللحم إلى لسان العصفور.

ونُغطى الوعاء ونترك الشوربة حتى تصل لدرجة الغليان.

بعد غليان الشوربة، نقوم بتهدئة النار، ونضيف الفلفل الأسود المطحون، ونُغلق الغطاء مع مراعاة مواربته حتى لا تفور الشوربة وتخرج خارج الوعاء وتنطفئ النار.

فى حالة عدم توفر شوربة دجاج أو لحم، نتبع الخطوات الآتية:

نضع  وعاء عميق على نار متوسطة حتى يسخن.

نُضيف زيت الزيتون للوعاء بعد أن يُصبح ساخنًا.

نضع كمية لسان العصفور فى الوعاء الساخن المُحتوى على زيت الزيتون، ونُقلبه جيدا حتى يصل إلى اللون الذهبى البنى.

نُخرج لسان العصفور الذى قمنا بتشويحه، ونضعه فى طبق جانبى.

فى نفس الوعاء نضع مرقة الدجاج، ونُضيف له الماء والقليل من الملح والفلفل، ونُقلب المكونات حتى تمتزج.

نُضيف لسان العصفور الذى تم تشويحه إلى الوعاء المحتوى على المرقة، ونُقلب جبدا، ثم نترك جميع المكونات فى الوعاء حتى تصل للغليان لمدة 3 دقائق.

تٌقدم شوربة لسان العصفور على موائد الغداء، وكذلك على موائد العشاء مع قطع من الخبز المحمص.