كانت أكبر مشكلاتى مع المطبخ، إنى مش عايزة ماما تعلمنى الطبيخ، عايزة أتعلمه مع نفسى، من غير ما يتقالى اعملى كده وما تعمليش كده، كان سلوك غريب بس نفع معايا جدا، لما اعتمدت على نفسى في المطبخ نجحت نجاح باهر، لدرجة إن لقبى في البيت اتغير وبقى الشيف، اللى عايز يسأل عليا أنا فين بيقول الشيف إيمان فين.. ماما كانت زمان تتحايل عليا أدخل أعمل حلة أرز، أسلق شوية مكرونة، كنت للأسف برفض، كانت المذاكرة اللى استمرت معايا سنين عمرى كله، بحكم شغلى، كانت واخدة كل وقتى، وكنت بستعملها حجة دايما عشان أتهرب من شغل المطبخ بالذات، كنت بحب أعمل كل حاجة في شغل البيت، تنضيف تلميع، ديكورات، أى حاجة، لكن محبش وقفة المطبخ نهائى.. لحد ما أخدت قرار مع نفسى، وقلت كفاية استعباط، كفاية دلع، زى ما بتبذلى مجهود كبير جدا جدا في شغلك، وبتتفانى فيه، لازم تبذلى نفس المجهود وخصوصا في المطبخ، مهم إنى اللى في البيت ياكلوا من عمايل ايديكى.. ودخلت المطبخ ومن ساعتها محدش بيرضى ياكل غير من ايدى.

اهتميت بكل تفاصيل الطبخ، النضافة والتزيين، ظبطة التسوية، التنويع لكسر الملل، الألوان عشان العين تتمتع، اهتميت بالتوابل والزيوت، ذاكرت مطبخ على قد ما قدرت وكل يوم بخصص حوالى ساعة على الأقل علشان أذاكر موضوع جديد ينفعنى في المطبخ والمدونة.. وكان من الحاجات اللى اهتميت إنى اتعلمها إن مفيش حاجة اسمها مبعرفش أعمل الصنف الفلانى، ليه منعرفش؟ عشان معملناش الصنف ده قبل كده؟! مش سبب على فكرة، كلن لازم أفهم ده كويس وأعرف إن الحاجة اللى معملتهاش قبل كده هعملها زى ما عملت غيرها كتير وكنت كل طبخة قبل كده هى أول مرة تتعمل.. نفسى أحقق هدف من خلال مدونة #جوا_الحلة إن كل اللى بيقولوا #ملناش_في_المطبخ يبقى ليهم فيه، ومش بس كده يبقى أساتذة طبخ، شيفات كبار زى المحترفين، نفسى كل ست وراجل يتعلموا وصفات متنوعة يبسطوا بيها نفسهم واللى معاهم، وعشان كده بحاول أحط كل جهدى في المدونة عشان احقق الهدف ده، وبذاكر كل يوم عشان أكون جديرة بثقة متابعى وأصدقاء #جوا_الحلة.

النهاردة هنقدم لكم صينية السجق بالبطاطس والجبنة الموتزاريلا، وصفة شهية أوى، سهلة أوى، سريعة أوى أوى فى التحضير، ومش محتاجة شطارة ولا مهارة، هنحط شوية حاجات ومكونات على بعض وهنعمل صينية خرافية فى حلاوة طعمها، وممكن نعملها لو عندنا عزومة، ويا سلام يا سلام لو اللى على العزومة مش مصريين، هتعلق معاهم جدا الوصفة دى.. يلا بينا نعرفها.

المكونات:

1/2 كيلو سجق شرقى
بصلة مُقطعة شرائح

2 فص ثوم شرائح
2 ملعقة طعام معجون طماطم

كوب عصير طماطم
1/2 ملعقة شاى ملح

1/4 ملعقة شاى فلفل أسود مطحون

1/2 ملعقة شاى ببريكا

1/4 ملعقة شاى بودرة بصل

1/4 ملعقة شاى بودرة ثوم

1/4 ملعقة شاى فلفل أحمر حار ناعم (حسب الرغبة)

2 حبة طماطم (بندورة) مقطعة مكعبات

1 حبة فلفل أخضر رومى مُقطع مكعبات

1 حبة فلفل أصفر مُقطع مكعبات

زيتون أسود شرائح

ملعقة طعام بقدونس مفروم

ملعقة طعام زيت زيتون

4 حبات بطاطس (بطاطا) متوسطة الحجم مقطعة مُكعبات

جبنة موتزاريلا مبشورة

طريقة التحضير

في وعاء عميق، نضع لترين من الماء ونضع الوعاء على نار متوسطة إلى مرتفعة، حتى يصل الماء لدرجة الغليان.

بعد أن يصل الماء للغليان، نقوم بوضع السجق بداخله لمدة 3-4 دقائق، مع تخفيض درجة الحرارة إلى متوسطة ضعيفة، بعد مرور 4 دقائق، نرفع السجق من النار ونُصفيه من الماء.

في مقلاة، نضع زيت الزيتون، وعلى نار متوسطة نضيف البصل والثوم ونقلبهم جيدا حتى نحصل على لون أصفر فاتح، ثم نقوم بإضافة السجق الذى سبق سلقه، ونتركه على النار لمدة 7-10 دقائق مع مراعاة تقليبه على جميع الجهات حتى يأخذ اللون البنى الداكن.

بعد 5 دقائق من إضافة السجق، نُضيف عصير الطماطم ومعجون الطماطم والفلفل الأخضر والأصفر والتوابل والملح إلى السجق ونُقلب جميع المكونات جيدا، ونترك المكونات لمدة 5 دقائق أخرى بحيث يتشرب السجق الطعم الموجود بالإضافات، وقبل أن نرفع السجق من على النار بدقيقة واحدة نقوم بإضافة الزيتون الأسود، وذلك حتى لا يأخذ الزيتون مرارة طعم من وضعه على النار لمُدة طويلة، بعدها نرفع السجق ونضعه جانبا.

في وعاء عميق به زيت للقلية، نقوم بتحمير مُكعبات البطاطس، حتى نحصل على لون أصفر ذهبى جميل، ثم نرفع مكعبات البطاطس ونضعها على ورق المطبخ ليتشرب الزيت الزائد، ثم نقوم بتتبيل البطاطس بالملح والفلفل والببريكا.

في صينية عميقة مناسبة الحجم، نقوم برص مُكعبات البطاطس كطبقة أولى بالصينية، ثم نُضيف السجق بالخضراوات والصلصة كطبقة ثانية، ثم نغطى الطبقتين السابقتين بطبقة من الجبنة الموتزاريلا، وفى فرن سبق تسخينه على درجة حرارة 180°م، نُدخل الصينية ونتركها بها مدة من 10-15 دقيقة فقط، أو حتى تذوب الجبنة الموتزاريلا، ثم نُخرج الصينية ونزينها بالبقدونس المفروم ونقدمها.

إيه رأيكم في الوصفة دى؟ اتشجعوا وجربوها وعرفونى رأيكم فيها بصراحة، اعملوها من باب التغيير أو حتى من باب أخد راحة شوية من الطبخ اليومى اللى فيه أرز أو مكرونة مع الخضار واللحمة أو الفراخ.. اعملوا السجق بالبطاطس لو ملكوش في المطبخ، الحكاية كلها محتاجة إنكم تكونوا بتعرفوا تحمروا بطاطس وسجق.. اوعوا تكونوا مبتعرفوش.. وبألف هنا.