طبخ الرز عموما بمختلف أنواعه، بيكون عُقدة عند كتير من البنات والسيدات، لأسباب كتيرة، ساعات لأنه بيعجن، أو بيتلسع من القعر، ومع ستات تانية مش بيستوى من النص كويس، ومن فوق بيكون ناشف، وتلاقى الحكاية عملت أزمة للبنوتة أو العروسة الجديدة اللى واقفة تعمل الرز فى بيتها، وفعلا بتحس لما مش بيظبط الرز معاها إنها فاشلة فى شغل المطبخ، أصل الرز أساسى فى سفرة الغدا المصرية ومفيش غنى عنه. طريقة تحضير أرز مبهر ودجاج شيش طاووق، وصفة غنية فى الطعم، رائعة فى الشكل، لذيذة فى التحضير، وألطف حاجة فيها، إنها تعتبر وجبة متكاملة، يتعمل جنبها طبق سلطة، ونقول لحبابنا اتفضلوا الغداء علطول. فى دايما لكل وصفة وية حركات تبان عادية، لكن هى دى اللى بتظبط الوصفة، وتخليها تحفة ساعة الأكل، وطريقة تحضير أرز مبهر ودجاج شيش طاووق ليها تكات وحركات، هنتعرف عليها كلها من خلال طريقة التحضير اللى هنتعرف عليها سوا دلوقتى وكمان على المكونات.

طريقة تحضير أرز مبهر ودجاج شيش طاووق: 

المكونات:

6 أوراك مخليه من العضم

كوب لبن رائب

3\4كوب زيت

1\2كوب خل

4\1كوب عصير ليمون

ملعقة كبيرة بابريكا وبصل بودر وثوم بودر

ملعقتين كبار صلصة

ملعقة صغيرة ملح وفلفل وبهارات فراخ

رشة بهارات مشكلة

للارز المبهر                                                      :

١بصل متوسط

2كوب رز مصرى

2كوب مرق دجاج

4 فصوص قرنفل

عود قرفة

2 فص حبهان

2 ورق لورا

ملعقة صغيرة كارى

ملعقة كبيرة زبدة وملعقة كبيرة زيت

مكعب مرق

طريقة التحضير:

يُغسل الأرز جيدا بالماء الجارى، ثم يُصفى من الماء الزائد.

فى وعاء عميق، نضع الزيت النباتى والزبدة، وأثناء تسخين الزيت والزبدة، نقوم بتسخين الماء، فى وعاء عميق مناسب ونضيف إليه مكعف المرق، ونتركه حتى يصل الماء لدرجة الغليان.

نضيف البصلة المفرومة، ونقوم بتشويحها على النار لمدة دقيقتين، ثم نُضيف القرنفل، والحبها، وورق اللورا، ، ونقلبهم جيدا، ثم نضيف التوابل.

تُضاف كمية الأرز المغسول إلى المكونات السابقة، ونعمل على تشويح الأرز مدة 10 دقائق، ثم الكارى الذى يجعلنا نحصل على لون أصفر للأرز، ثم نضع أكواب المرق، ونتركها حتى تصل لدرجة الغليان مع الأرز وباقى المكونات.

نُقلب المكونات، وبعد غليان الماء لمدة دقيقتين مع الأرز، نهدئ النار جدا، ونُغطى الوعاء، ونضع الشياطة أسفل الوعاء، ونترك الأرز حتى يصل لتمام التسوية؛ بعد حوالى 10 دقائق، نتأكد من تسوية الأرز بتذوق جزء منه بطرف ملعقة.

لتحضير الدجاج، نبدأ فى عملية تتبيله أولا، ففى وعاء عميق نضع كل المكونات المكتوبة سابقا، ثم نضع قطع الدجاج بالتتبيلة لمدة ساعتين أو أكثر.

نحضر طاسة مناسبة وعلى نار عالية نضع الدجاج بالتتبيلة لمدة 20 دقيقة، ثم نضعها تحت الشواية وكل فترة نقلبها لمدة نصف ساعة أو أقل، ثم نضع فحم فى ورق فويل ونطفأه بالزبد.

يوضع الأرز بعد تسويته فى طبق تقديم مُناسب، ثم يُضاف له قطع الدجاج، ويُمكن تزيين الطبق بالبقدونس الأخضر أو بالمكسرات حسب الإمكانيات المتاحة.

دى كانت طريقة تحضير أرز مبهر ودجاج شيش طاووق، تقدرى تعمليها فى العزومات، هتكون رائعة وتوفر عليكم وقت كتير فى التحضير، وبألف هنا وسعادة. 

ملحوظة:

استخدام الميه المغلية بيقلل مُدة التسوية جدا، وبيسرعها، يعنى لو راجعة من الشغل متأخرة وعايزة تنجزى الأكل بسرعة والتسوية تكون 100 – 100، اعملى الطريقة دى وهتتبسطى من نتيجتها، أهم شئ فى الموضوع تستخدمى المعيار الخاص بالميه بالظبط، يعنى لو عملتى معيار الرز بكوباية معينة يبقى لازم وضرورى معيار المياه يكون بنفس الكوباية.

تقدروا تتواصلوا مع صاحبة الوصفة فى جروب جوا الحلة