الغدا إيه النهاردة؟! الغدا بواقى يا حبيبى!! وهنا تبدأ الكارثة، يا إما حبيبها يتقبل الموضوع بروح رياضية ويتغدا بواقى أكل امبارح وأول امبارح، أو الله أعلم يحصل منه إيه؟! مش كل الناس عندها قابلية تاكل أكل بايت أو بواقى غدا اليوم أو اليومين اللى قبله، فى ناس كتير بتتخنق من الحوار ده، لو مكنش الأكل اللى متقدم لهم طازة وعمايل يوم بيوم مبيكلوش.. بس بردو ست البيت سواء كانت بتشتغل أو بتربى أولادها، متقدرش تفضل تواصل يوميا دون انقطاع على الطبخ، والتنويع فى الأصناف، ده غير الأدوار التانية اللى بتقوم بيها بره أو جوا البيت، أكيد من حقها تريح يوم أو يومين من تحضير وجبة الغدا المزعجة فى كل تفاصيلها، وبردو من حق اللى فى البيت إنهم ياكلوا، يعنى أكيد مش هيقعدوا جعانين!!

الأيام اللى زى دى فى البيت ليها حلول كتير ظريفة وسريعة ومفيهاش مجهود ولا تكلفة، ومن ببين الحلول دى، أجنحة الفراخ، الحاجة البسيطة دى اللى أحيانا كتير لما بنشترى الفرخة بنرميها فى الزبالة، أو لو بنربى قطة بنقدمها لها تاكلها، إنما هى الصراحة تنفع تبقى وجبة سريعة كده وتسد حالة الجوع، وفى نفس الوقت متتعبش فى عمايلها وتحضيرها.

لما بنروح مطعم بيتزا هت فى أى مكان فى العالم، بنلاقى إن القايمة بتاعته بتحتوى دايما على وصفات لأجنحة الفراخ، وبتختلف كل وصفة عن التانية خصوصا فى الصوص اللى بيتقدم معاها، ومن أجمل وأشهر أنواع الصوص اللى بتتقدم مع أجنحة الفراخ، صوص البافالو، بيكون سويت آند سبايسى، يعنى حلو ومشطشط، هنتعرف مع بعض النهاردة على طريقة تحضير أجنحة الفراخ بصوص البافالو ونخليكى تدمنى تحضيرها فى البيت وتستغنى تماما عن شراها من بره، ده كمان غير إننا هنستغل جزء كان مهمل فى الفرخة ونعمل منه وصفة هايلة.

المكونات:

نصف كيلو أجنحة دجاج

2 كوب دقيق

1 ملعقة طعام ملح

1 ملعقة شاى فلفل أسود مطحون

ملعقة شاى من التوابل الآتية: (ببريكا، شطة حمراء)

1/2 لتر زيت قلى

لصوص البافالو:

ملعقة طعام زبدة

2 ملعقة طعام صلصة حمراء حارة

ملعقة شاى سكر

1/4 ملعقة شاى فلفل أسود مطحون

ملعقة شاى ببريكا

ملعقة شاى ثوم بودرة

1/2 ملعقة شاى شطة حمراء

ملعقة شاى نشا

ملعقة شاى خل أبيض

طريقة التحضير

يتم تقطيع الأجنحة بحيث نعمل على إزالة طرفها السفلى المدبب وذلك باستخدام سكين حاد.

يتم غسل الأجنحة جيدا بالماء والخل، ثم تشطف جيدا ويبدأ تجهيزها للتتبيل.

فى طبق عميق نُضيف المكونات الآتية: (2 كوب دقيق، ملح، فلفل أسود مطحون، ببريكا، شطة حمراء)، ونقوم بتقليب جميع المكونات جيدا بملعقة خشبية، ثم نُضيف أجنحة الدجاج إلى المكونات، ونُقلبها جيدا حتى تكتسى كل أجزاء الأجنحة بالدقيق المُتَبّل.

فى وعاء عميق، نضع زيت القلى على نار متوسطة ونتركه حتى يسخن.

نبدأ بعد ذلك فى إضافة قطع أجنحة الدجاج إلى زيت القلى الساخن، ونُراعى أن نقوم بتهدئة درجة الحرارة قبل وضع الأجنحة، كما نُراعى كذلك أن يغمر الزيت الأجنحة داخل الوعاء حتى لا نضطر لتحريك القطع كثيرا داخل الزيت، مما يسبب تفكك الخلطة الخارجية.

تأخذ القطعة حوالى من 5-10 دقائق فى زيت القلى لتصل لمرحلة التسوية، ويجب ألا نُخرج قطع الأجنحة من الزيت بمجرد تغير لون الطبقة الخارجية للون الذهبى البنى، لأن لون الطبقة الخارجية يتحول سريعا للون الذهبى البنى، قبل وصول لحم الدجاج من الداخل إلى التسوية الكاملة. نستخرج قطع الأجنحة، ونضعها على ورق المطبخ لنتخلص من الزيت الزائد.

تحضير صوص البافالو

فى وعاء عميق، نضع الزبدة وعلى نار هادئة نتركها لتذوب، ثم نُضيف الصلصة الحمراء الحارة، والسكر، والفلفل الأسود، والببريكا والشطة الحمراء، وبودرة الثوم، والنشا، والخل الأبيض، ونُقلب كل المكونات جيدا حتى تمتزج مع بعضها البعض، ونتركها على النار حوالى 5 دقائق حتى يأخذ الصوص السُمك المطلوب، ثم يُرفع من على النار.

فى طبق تقديم مناسب، توضع أجنحة الدجاج ويُسكب فوقها صوص البافالو ثم تُقدم.

يا رب تكون وصفتنا سهلة ودمها خفيف، جربوها فى البيت وحاولوا تراعوا إنكم لما تعملوها تبقى هتتاكل فورا وفى وقتها عشان ده بيفرق جدا فى الإحساس بالطعم خصوصا مع صوص البافالو، الوصفة دى كمان حلوة جدا كوجبة سريعة "سناك" لأطفالكم وهمه لسه راجعين من المدرسة، بس نراعى إننا نقلل كمية الشطة عشان صحتهم