طريقة تحضير كرواسون


المطبخ الفرنسى شهرته عالمية، والمخبوزات من أكبر أسباب شهرته، هو مطبخ قوى جدا خصوصا فى المخبوزات والحلويات، زى وصفة النهاردة.. الكرواسون.. والتسمية بتاعته جاية من شكله (كرواسون يعنى الشكل الهلالى).. وفى روايات كتيرة بتقول إن الكرواسون اتعرف لأول مرة فى القرن الــ13 فى فيينا – النمسا، ومن النمسا لفرنسا اللى حددت له الشكل الهلالى اللى انتشر فى كل العالم بعد كده بنفس شكله ووصفته الفرنسية النسخة!

الكرواسون فكرته بتعتمد أساسا على الدقيق والزبدة، وازاى بيتم التعامل معاهم بعمل اكتر من طبقه وتشكيلها على شكل طبقات متعددة عشان نوصل للشكل الهلالى الجميل.. تعالوا مع بعض نعرف طريقة تحضير الكرواسون ومكوناته!

 

طريقة تحضير كرواسون

المكونات:

2 كوب دقيق للعجن

معلقة صغيرة خميرة  

معلقة صغيرة سكر

ذره ملح

كوب لبن

نص كوب زيت

بيضة واحدة (يتم فصل البياض عن الصفار)

زبده أو سمنة للفرد

 

للحشوة والتزيين:

جبنة رومى

جبنة شيدر مبشورة

جبنة فيتا

زعتر أو سمسم

شيكولاتة

 

طريقة التحضير

فى بولة العجن هنحط الخميرة واللبن والسكر والملح والزيت ونقلب بالراحة وننزل بياض البيضة ونقلب ونبدأ نحط دقيق كوباية ونعجن ونزود بالراحة عشان العجينة تطلع ممتازة، ونعجن فيها كتير لحد ما تبقي لينة وطرية جدا .. لو فى العجان الكهربى نخليه على سرعة متوسطة لحد ما نوصل للقوام اللي حنا عايزينه.

ناخد العجينة ونكورها ونقطعها كور صغيرة متساوية في الحجم وبعدين نجيب الزبدة أو السمنة ونفرد كل كورة ((مش لازم نفردها أوي)) وندهن سمنة ونرصهم فوق بعض بس لازم كل واحدة عليها طبقة زبدة أو سمنة ونبدأ نحط الحشو اللى احنا عايزينه، نخلص الكمية كلها ونضغط عليها ونقفلها بسلوفان ونحطها فى الفريزر لمدة نص ساعة تقريبا، نطلعها لما السمنة أو الزبدة تمسك فى العجين خالص ونفرد العجينة على الآخر ونحاول نخليها دايرة ونقطعها مثلثات ونلفها ونرصهم فى صينية مدهونة سمنة ونسيب مسافات عشان العجينة هتفرد شوية ونغطيها بفوطة عشان متنشفش لحد الانتهاء من تشكيل الكمية كلها، صفار البيضة هنحط عليه نقطة خل ورشه ملح وندهن بيها الوش ونرش زعتر أو حبه البركة أو سمسم أو نسيبه ساده.

ملحوظة مهمة:

العجينة دي ينفع تشكليها أي شكل ملفوف مستطيل أو نطبقها تطبيقة واحدة 

ينفع نحشيها أي حاجة زي جبنة أو سوسيس أو نسيبها سادة ونغيطها بشيكولاته.

لو عايزه تعملي شيكولاته هتجيبي شيكولاته خام وضغف كمية الشيكولاته كريمة طبخ ونحطها على نار هاديه هتسيح على طول بالمعلقة تنزلي على الكرواسون هيمسك فيه على طول 
وأهم ملحوظة أي مخبوزات عايزاها طرية تتغطى بفوطة أول ما تطلع من الفرن ولما تخزنيها تحطيها ف علبة مقفلوة ممكن تتساب ف الفريزر إنما مينفعش تتساب ف التلاجة هتنشف.. وبالهنا.