ديسباسيتو يا جماعة علينا.. الكلمة الإسبانية اللى دخلت كل بيوت العالم بسبب الغنوة المشهورة.. بس الموضوع طلع اكبر من مجرد غنوة.. دى طلعت وصفة كيكة شيكولاتة برازيلية رهيبة.. الناس بتحبها لدرجة الجنون.. كيكة ديسباسيتو تقدر بقطعة واحدة صغيرة منها تحسن الحالة المزاجية للإنسان.. أيوه لأنها غنية بالشيكولاتة والكاكاو، فده بيكون سبب فى إنها تساعد على إفراز إنزيم السعادة " هرمون الدوبامين" اللى بمنتهى البساطة هيحول حالتك من إنسان حزين أو مكتئب لإنسان سعيد ومنسجم جدا مع الحياة.. لو عاويزين تتعرفوا على معلومات أكتر عن هرمون الدوبامين وغيره من الإنزيمات افتحوا الرابط ده 

هندخل المطبخ مع بعض نتعلم طريقة تحضير كيكة الديسباسيتو ونسعد بيها نفسنا وكل اللى بنحبهم، ويا سلام لو عملناها لمناسبة سعيدة.. يبقى مفيش أروع من كده.

طريقة تحضير كيكة ديسباسيتو:

المكونات:

أولا: طبقة الكيك.

نص كيلو دقيق سبونج شيكولاتة
٦ بيضات
معلقة كبيرة فانيليا
كوباية إلا ربع لبن

ثانيا: الطبقة الثانية.

كوباية لبن و٥ معالق كبيرة نسكويك 
كوب بودرة موس شيكولاتة وكوب لبن ساقع جدا
٣ معالق نوتيلا ونص كوب لبن
٢٠٠ مل كريمة حلويات لباني 
٢٠٠ جم شيكولاتة  swifax

 طريقة التحضير.

نص كيلو دقيق سبونج عليهم ٦ بيضات وكوباية إلا ربع لبن واضرب عشر دقايق ضرب متواصل هتلاقيها بتعلى جدا ولونها بيفتح.

املى نص القالب ودخليه الفرن على ١٦٠ درجة مئوية لمده تلت ساعة.

بعد ما يطلع نسيبه يهدى خالص ونخرمه بخلة أسنان، ونكون محضرين كوباية لبن عليها ٥ معالق نسكويك ونسقيها الكيكة كويس، هى هتشربه كويس جدا.

بعد كده نضرب كوب بودرة موس شيكولاتة مع كوب لبن ساقع كويس جدا لغاية ما يمسك وبعدين نضيف ٣ معالق نوتيلا ونص كوب لبن.

بعد كده نجهز طبقة التزيين ٢٠٠ مل كريمة حلويات لباني (العلبة الصغيرة خالص) وعليهم ٢٠٠ جم شيكولاتة غامقة (بستعمل swifax حلوه جدا) على حمام مائى ونسيبها تبرد خالص
بعد كده نضيفها على خليط الموس ونضرب كويس ونغطي الكيك بالخليط ده.

في الآخر عملت خطوط تزيين بالشيكولاتة.

دى كانت وصفتنا.. نتمنى تعجبكم.. ولو عندكم أى استفسارات تقدروا تدخلوا على الرابط ده وتسألوا صاحبة الوصفة مباشرة عن أى حاجة تخص الوصفة.. وبالهنا.