بيقولوا إن الفطار أهم وجبة فى اليوم كله؛ وأنا طفلة ماما كانت دايما تقولى: "افطرى كويس عشان تعرفى تكملى اليوم كويس"، كنت بقفش على الأكل دايما وكنت نحيفة جدا، كانت ترجع ماما تقولى: "الفطار الصبح زى البنزين فى العربية، عُمرك شفتى عربية بتمشى من غير بنزين؟!".

الفطار فعلا الوجبة اللى بتساعدنا على تغذية جسمنا بالمواد المهمة ليه عشان يقوى ويقدر يبدأ اليوم بقوة ونشاط وصحة ممتازة، وطبعا لو وجبة الفطار اتلغت أو اتأخرت، أو كانت مش متكاملة الأركان الغذائية، بيحصل خلل فى الجسم كله، وساعات كتير وَخَم، وكسل وقلة تركيز.

احنا بصراحة أغلبنا مش بيهتم بوجبة الفطار، أو مش بيفطر أصلا، كتير مننا بينزل شغله، أو مكان دراسته من غير ما يفطر، ويقول لنفسه لسه هضيع وقت فى الفطار؟! وينسى إنه بيضيع طاقته وتركيزه. كتير مننا بيفطر برا البيت، من على عربية فول فى الشارع، أو يدخل يطلب طبق كُشرى على الساعة 12 أو 1 الظهر، اللى هو أصلا معاد الغداء، أو وجبة التصبيرة!

مهم بالنسبة لنا إننا نرجع نهتم جدا بوجبة الفطار، ونعرف إن جسمنا له علينا حق، وإننا لازم نراعى الحق ده كويس. وعشان نكون عمليين فى اللى بنقوله، ميبقاش مجرد كلام لذيذ بنكتبه وخلاص، فاحنا هنا فى مدونة #جوا_الحلة، هنقدم إن شاء الله، سلسلة طويلة من أفكار الفطار، ومش أى فطار، ده فطار صحى ومغذى ولذيذ، هنقدم لكم #برطمان_الفطار، ودى هتكون وصفات جديدة جدا، وصحية جدا، ومُشبعة جدا جدا، من أهم مميزات النوع ده من الوجبات، إنها بتتحضر تقريبا بدون أى مجهود، أنتِ بتشترى مكونات الوجبة وتقفى 5 دقايق تخلطيهم مع بعض، وخلصت الحكاية على كده.

النهاردة هنقدم أول نوع من برطمانات الفطار، وهنقدمه بطريقتين مختلفتين، فى الطريقتين هنلاقى إن المكون الرئيسى هو الشوفان Oatmeal و بذور الشيا Chia seeds، وبندخل معاهم فاكهة الموسم، وبعض الإضافات التانية.

لما نقول الشوفان، يبقى فوايد صحية وغذائية كتيرة أوى للجسم والبشرة، هنتعرف عليها سوا، ونحاول نركز فى إننا مش مجرد بنقدم فكرة جديدة على المطبخ المصرى والعربى بشكل عام، احنا بنفكر نقدم وجبة صحية وطعمها لذيذ.

إيه هو الشوفان؟

هو نبات يعتبر من الحبوب وفى نفس الوقت هو عشبي , ويصنف من النباتات الحولية بالنسبة للنمو, وهو يشبه القمح والشعير في شكله ولكن حجمه يتوسط بين الاثنين.

إيه هى بذور الشيا؟

بذور الشيا، يطلق عليها بالعربية بذور القصعين أو المريمية، الشيا هو النوع الإسباني من المريمية. الشيا كانت بتتزع بذورها في المكسيك، موطنها الأصلي.

فوائد الشوفان:

يعتبر من مهدئات الأعصاب، ومُضاد طبيعى للاكتئاب.

يحتوى على مادة Inositol اللى بتحافظ على معدلات الكوليسترول الطبيعية فى الدم.

يحتوى على معادن الكالسيوم والمغنسيوم والبوتاسيوم اللى بتساعد على تغذية الجسم.

يُساعد على فقدان الوزن لاحتوائه على نسبة عالية من الألياف.

يُعالج من مرض الإمساك.

يحتوى على نسبة عالية من مضادات الأكسدة، ولذلك فهو يُساعد القلب على البقاء بحالة جيدة وعدم التعرض للجلطات.

يعمل على ترطيب الجلد وتنعيمه.

يحتوى على نسبة عالية من البروتينات، مما يجعله بديلا جيدا ورخيصا للحوم.

يقى من الإصابة بأمراض سرطان المعدة.

فوائد بذور الشيا:

عالية بالألياف، تحتوي الملعقة الكبيرة من بذور الشيا على 4.8 جرام من الألياف التي تُساعد الجهاز الهضمي على العمل بكفاءة وامتصاص العناصر الغذائية بامتياز.

غنية بالأوميجا 3، تحتوي بذور الشيا على نسبة عالية من أوميجا 3 الذي يعمل على زيادة الذكاء ومقاومة السرطان وتقليل الكوليسترول الضار.

غنية بالكالسيوم، أى أنها تقى العظام من الهشاشة.

مفيدة لصحة القلب، حيث تحسن من ضغط الدم وتزيد نسبة الكوليسترول الجيد وتقلل من  نسبة الكوليسترول الضار.

المادة الجيلاتينية الموجودة في بذور الشيا تعمل على إبطاء عملية الهضم وبالتالي تبطئ عملية امتصاص السكر في الدم مما يقلل من نسبة ارتفاع السكر عند مرضى السكري.

طريقة عمل برطمانات الشوفان والتوت.

المكونات:

100 جرام شوفان

1/2 ملعقة شاى بذور شيا

علبة زبادى

2 ملعقة طعام عسل أبيض

1/4 لتر لبن أو لبن جوز الهند

100 جرام توت أحمر

100 جرام توت أسود

100 جرام كريز

100 جرام فاكهة الموسم (تُفاح)

طريقة التحضير:

نُحضر برطمان زجاجى نظيف، ونضع به 100 جرام من الشوفان.

يُضاف إلى الشوفان بذور الشيا، ثم يُضاف اللبن وتُخلط المكونات الثلاثة جيدا.

يُضاف نصف كمية الزبادى ويوضع عليه ملعقة عسل أبيض لإعطائه بعض الحلاوة.

يتم إضافة نصف كمية التوت الأحمر والأسود والكريز وقطع التفاح إلى الطبقات السابقة.

يُضاف النصف الثانى من الزبادى وتُوضع عليه ملعقة عسل أبيض أخرى.

تُضاف نصف كمية الفواكه على الطبقات السابقة.