فصل الصيف فى مصر والدول العربية بيكون حار أو حار جدا جدا، وفى أيام بنحس فيها إننا مش قادرين نتحمل حرارة الجو، وبتبقى الحكاية أصعب لما الرطوبة بتكون مرتفعة، وعشان ده كله بنكون مشتاقين دايما للمشاريب الساقعة بكل أنواعها، وكمان الفواكه، الجسم ساعتها بيبقى محتاج ترطيب وسكريات تديله طاقة. وعشان احنا فى المدونة بتاعتنا مصدقين إن كل واحد وواحدة فى بيتهم يقدروا يعملوا كل حاجة بإيديهم وتطلع فى منتهى الجمال وبصراحة أجمل من حاجة بره البيت بمراحل، قلنا لازم نعمل معاكم وصفات كتير للمشاريب الساقعة عشان الكل يعرف إنها سهلة وتتشجعوا تعملوها فى البيت بنفسكم. وصفتنا النهاردة هى أوريو ميلك شيك، أسهل منه مفيش، وأطعم منه مفيش، ينزل فى المعدة ويعمل انتعاش ملوش مثيل للجسم كله، ويعمل فوقان عالى، وبالنسبة لعشاق الشيوكولاتة فهو وصفة عبقرية سريعة جدا فى تحضيرها ومش محتاجة أى مهارة، وهيلاقوا فيها اللى بيحبوه.. كل المطلوب مننا إننا نشوف المكونات البسيطة القليلة.. ونعرف الخطوات اللى مفيهاش أى خدعة ونعملها وفى أقل من 3 دقايق يبقى معانا أحلى مشروب ساقع بيتى جميل ومضمون.. يلا نتعرف على المكونات وطريقة التحضير.

المكونات (تكفى لفردين):

6 حبات من بسكويت أوريو

4 ملاعق طعام آيس كريم فانيليا

كوب لبن

طريقة التحضير

فى خلاط كهربائى، نضع كمية بسكويت أوريو، ونبدأ فى طحن البسكويت داخل الخلاط حتى يصبح مفتتا تماما فى صورة دقيقة جدا.

نقوم بعدها بإضافة اللبن وآيس كريم الفانيليا إلى بسكويت أوريو المطحون فى الخلاط الكهربائى، ثم نعاود تشغيل الخلاط حتى تمتزج جميع المكونات مع بعضها وتُعطى السمك المطلوب.

فى الأكواب الزجاجية المُناسبة، نقوم بسكب الخليط ويُقدم فورا.

نحب نعرف من متابعى الصفحة إيه رأيكم فى الوصفة خصوصا لو فعلا جربتوها فى البيت عندكم، وكمان نحب نعرف إيه أكتر المشاريب اللى بتحبوها فى فصل الصيف.