ربنا ما يقطع لكم عادة!! من أروع الجمل اللى ممكن أسمعها فى حياتى، دعوة حلوة صافية للى بيقدم حاجة من غير مقابل، للناس اللى عندها قدرة تساعد ومش منتظرة مقابل.. الجملة الرائعة دى كنت بسمعها وأنا طفلة كتير جدا فى بيتنا أول يوم عيد الأضحى المبارك، وخصوصا وقت توزيع لحمة الأضحية، الناس بمجرد ما تاخد نصيبها فى اللحمة يقولوا لنا : "ربنا ما يقطع لكم عادة"، علطول ماما وبابا كانوا يردوا ويقولوا : "آمين"! الأضحية سُنَّة، اللى يقدر بيعملها واللى ميقدرش بيسبها، لكن الحقيقة إن البركة فى دعوة الناس إن ربنا يوفق اللى بيدبح إنه يستمر فى الدبح، هى مفتاح السر فى استمرارنا كأسرة على مدار سنين طويلة، فى الدبح سنويا فى عيد الأضحى، ببركة دعاء الناس الطيبين، وبالقبول اللى ربنا سبحانه وتعالى بيحطه فى العمل الطاهر ده، اللى بيفهمنا درس كبير جدا فى الحياة، إن الحياة مشاركة، واللقمة لما تتقسم تزيد مش تنقص، والبركة تحل على الجميع!

ومن العادات اللى الواحد بيدعى إنها متتقطعش، عزومة ولمة الأهل والأحباب فى بيت الوالد أول يوم العيد، اللمة الحلوة على ترابيزة سفرة مليانة بخيرات الله، السفرة اللى فيها الفتة المصرية الجميلة بالخل والتوم، والكوارع والفشة، والممبار، وصينية الرقاق باللحمة المفرومة، ده غير أصناف اللحوم اللى ملهاش أول من آخر، وكل واحد يمد إيده يناول التانى، والكلام محلاش غير على سفرة الأكل، والواحد يومها يحس بقيمة العيلة، والأسرة، واللمة، ويتمنى من ربنا يديم عليه النعمة ويزيدها ويحفظها من الزوال.

لما اهتميت جدا بشغل المطبخ والأكل والوصفات، فهمت إن السر الحقيقى في ظبطة الفتة في حاجتين اتنين بس، تحميصة (تحميرة) العيش، وفى الصلصة الحمرا بالخل والتوم، همه دول اللى فيهم التقل كله، همه اللى فيهم سر الصنعة زى ما بيقولوا، يعنى اللى تتقن الخطوتين دول، يبقى أكيد الفتة بتاعتها حلوة وملهاش حل، والصلصة أذواق، يعنى فيه الست اللى هى وأهل بيتها بيحبوا الخل الكتير، وفى بيحبوا التوم الكتير، وفى اللى صلصة دى بالنسبة لها ملهاش معنى إلا لو فيها شطة حامية.. عشان كده انا دايما بقول إن الوصفة المظبوطة في أى أكلة، هى اللى بتناسب ذوقك وذوق أهل بيتك، يعنى بالبلدى اللى فيها التاتش بتاعك. يلا بينا بسرعة نعرف ازاى نعمل الفتة المصرية بالخل والتوم، وهى سهلة جدا إن شاء الله.

المكونات:

كيلو لحم بقرى

2 كوب أرز مصرى

1 كوب شعرية

2 حبة بصل أبيض كبير مُقطعة شرائح

4 فصوم ثوم مفروم

1/2 ملعقة شاى ثوم بودرة

1/2 لتر عصير طماطم

250 جم معجون طماطم

ملح، فلفل أسود، كمون، شطة حمراء خشنة (حسب الرغبة)

4 ملعقة طعام زيت نباتى

1/2 لتر زيت قلية

2 ملعقة طعام دقيق

1 ملعقة زبدة

3 ملاعق طعام خل أبيض

عصير 2 ليمونة

3 ورقات لورا

5 فصوص حبهان (هيل)

2 رغيف خبز شامى مُقطع مثلثات

طريقة التحضير

أولا: اللحم

يتم غسل اللحم جيدا، ويتم تقطيعه على شكل مكعبات متساوية فى الحجم.

فى وعاء عميق، نضع اللحم، ثم نُضيف كمية مناسبة من ماء الصنبور للوعاء (تكفى لتغطية سطح اللحم بالكامل)، ونضع 3 ورقات لورا، و5 حبات من الحبهان (الهيل)، وعود قرفة، والبهارات (ملح، فلفل أسود مطحون)، و نقوم بتغطية الوعاء، ونتركه على نار متوسطة حتى يصل الماء لدرجة الغليان.

نقوم بعدها بتخفيض درجة الحرارة، ونترك اللحم لمدة حوالى ساعة ونصف إلى ساعتين تقريبا حتى يصل للتسوية الكاملة، ويُمكن اختبار مدى تسويتها بواسطة شوكة، فإذا انغرست الشوكة بسهولة فى قطع اللحم، فإن هذا يعنى وصولها للتسوية الكاملة. تُرفع مكعبات اللحم من على النار وتستخرج من الشوربة، وتترك لتبرد قليلا.

ثانيا: تحضير الخبز

يتم تحميص الخبز، بوضعه فى الفرن على درجة 160°م لمدة ربع ساعة تقريبا أو حتى يصبح لونه بنيا داكنا، أو تحميره فى كمية من السمن. ولك أن تختارى نوع الخبز المفضل بالنسبة سواء الخبز المصرى البلدى، أو الخبز الشامى.

ثالثا: الأرز بالشعرية

يُغسل الأرز جيدا بالماء الجارى، ثم يُصفى من الماء الزائد.

فى وعاء عميق، نضع ملعقة من الزيت النباتى مع الزبدة، ثم نُضيف الشعرية ونقلبها جيدا حتى تأخذ اللون الذهبى البنى.

تُضاف إلى الشعرية كمية الأرز المغسول، ونضع 3 أكواب من الماء الساخن إلى الأرز والشعرية، ثم نضيف 3 ملاعق شاى من الملح، ونُقلب المكونات، وبعد غليان الماء، نهدئ النار جدا، ونُغطى الوعاء، ونضع الشياطة أسفل الوعاء، ونترك الأرز بالشعرية حتى يصل لتمام التسوية، بعد حوالى ربع ساعة. نتأكد من تسوية الأرز بتذوق جزء منه بطرف ملعقة.

رابعا: طبقة الصلصة الحمراء بالخل والثوم

للحصول على 1/2 لتر عصير الطماطم، نحضر حبات الطماطم (حوالى كيلو)، ونغسلها جيدا، ونتركها لتجف، ثم نقطعها نصفين، وبملعقة طعام، نفرغ قلب الطماطم من العصير والبذور، ونجمعها كلها فى وعاء ثم نضربها جيدا فى الخلاط للحصول على العصير. أما جلد حبات الطماطم فنحتفظ به فى الثلاجة (البراد) لنستخدمها فى عمل سلطة فى وقت لاحق.

فى وعاء عميق مُناسب، وعلى نار متوسطة، نضيف ملعقتان من الزيت النباتى وبعد تسخينه، نُضيف 4 فصوص من الثوم المفروم للزيت ونقلبه حتى يصفر قليلا، ثم نضيف عصير الطماطم والخل ومعجون الطماطم والملح والفلفل والشطة والكمون وبودرة الثوم، ونضيف حوالى نصف كوب من ماء الصنبور لإعطاء سمك مناسب للصلصة.

تترك الصلصة على نار هادئة جدا حوالى 10- 15 دقيقة حتى تأخذ السمك المطلوب، ثم يُضاف إليها عصير الليمون قبل أن ترفع من على النار بقليل.

خامسا: بصل التقلية

بعد غسل حبات البصل وتقطيعها على شكل شرائح ذات شكل هلالى، نرش عليها ملعقتا طعام من الدقيق، حتى نحصل على الطعم المقرمش.

فى مقلاة بها زيت القلى الساخن، وعلى نار متوسطة إلى هادئة، نضع شرائح البصل ونحمرها حتى تأخذ اللون الذهبى البنى، ثم تستخرج على طبق به ورق مطبخ ليمتص الزيت الزائد.

فى طبق عميق، يتم رص طبقات الفتة، وذلك بوضع الخبز المحمص أولا، ثم الأرز بالشعرية، ثم يتم تسقية الأرز بالعشرية والخبز المحمص بالقليل من شوربة الكوارع، بحيث يُصبح الخبز طريا، ثم يتم وضع الكوارع وتُرش الصلصة الحمراء على كل الطبقات من أعلى. يوضع البصل المحمر فوق قمة الطبق، أو يترك فى طبق جانبى حسب الرغبة.

يا رب تكون الوصفة سهلة وواضحة، ويا رب تكون عجبتكوا، يا ريت نشوف تعليقاتكم على وصفتنا على المدونة وكمان على صفحتنا على الفيسبوك. يوم ما تعملى الفتة بالخل والتوم ممكن تعملى جنبها صينية رقاق باللحمة المفرومة وممبار وشوربة كوارع وسلطة بلدى بالبصل، وسلطة طحينة وتبقى سفرة ملهاش حل.. وبالهنا.