فى حاجات لايقة جدا على بعض، نفس الروح ونفس اللون ونفس الطعامة.. زى البرتقال والجزر، يمكن نستغرب فى الأول لما نلاقيهم متجمعين فى وصفة مع بعض، بس لما ناكل ونستطعم، بنعرف قد ايه لايقين الاتنين على بعض، زيهم زى البشر، ساعات تستغرب من وجود اتنين مع بعض فى علاقة، سواء صداقة أو جواز، بس لما تشوفهم سوا، تعرف غنهم اتخلقوا لبعض، والجزر اتخلق للبرتقال، خصوصا فى وصفات الحلويات والعصائر.. وصفتنا النهاردة عامللاها هدى عبد القادر، وهى طريقة تحضير كيك البرتقال والجزر، قد ايه سهلو وبسيطة، بس الطعم حكاية.. عشان كده قلنا لازم نشارك معاكم طريقة تحضير كيكة البرتقال والجزر، لأنها مش بس سهلة ولذيذة، هى كمان موفرة، ومكوناتها متاحة فى كل بيت ورخيصة فى التمن.

تعالوا مع بعض نتعرف على مكونات وطريقة تحضير كيكة البرتقال والجزر.

طريقة تحضير كيكة البرتقال والجزر:

المكونات:

3/4 كوب زيت

كوب ونصف سكر

جزرة مبشورة

3/4  كوب عصير برتقال

ملعقة كبيرة بشر برتقال

2/5  كوب دقيق

 4 بيضات

رشة ملح

1/2  باكو بيكنج بودر أو كيك شيف

طريقة التحضير:

في بولة يخلط الزيت مع السكر، ويضاف البيض وبشر البرتقال ويخفق جيدا، ثم عصير البرتقال ويضرب جيدا.

ثم يضاف الدقيق والبيكنج بودر والملح، ويقلب حتى تتجانس المكونات فقط ثم يوضع الجزر المبشور ويقلب جيدا.

يصب الخليط في قالب الفرن أو صينية متوسطة ويكون مدهونا بالسمن ومرشوشا بالدقيق.

تدخل الصينية الفرن على درجة 180°م حتى النضج.

لعمل الزينة حسب الرغبة:

يقلب السكر البودرة مع عصير البرتقال، حتى يتكون صوص سائل، ويوضع على وجه الكيك.

ويمكن تزيينها بشرائح البرتقال أو حسب الرغبة، أنا أفضلها بدون صوص وبألف هنا.

دى كانت وصفتنا، طريقة تحضير كيكة البرتقال والجزر، ولا أسهل ولا أروع من كده، جربوها وعرفونا رأيكم فيها.