وأنا طفلة صغيرة، كنت بكره اللبن، مش بطيقه، خصوصا كامل الدسم أبو وش قشطة ده، كانت كل ما أمى تروح بيا على دكتور أطفال، يقولها "خليها تشرب لبن كتير"، احتارت معايا، لحد ما جه فى دماغها تدخل اللبن فى شكل منتجات تانية عشان أقدر أتعامل مع الفكرة وأستفيد باللبن وجسمى يستفيد بيه، وأول ما فكرت، فكرت فى الرز باللبن، وعملته لنا منه يومها أطباق كتيرة، وأنا فعلا حبيته جدا وبقى هو أشهى طبق حلو بالنسبة لى كطفلة، وحتى كمان لما كبرت. لما تحبى تعملى الرز باللبن فى البيت يبقى لازم تجربى طريقتنا، اللى هى أحلى من المحلات.

طريقة تحضير أرز باللبن:

المكونات:

نصف كوب أرز مصري

كوب ماء

كيلو لبن كامل الدسم

٦ معالق كبيرة سكر

معلقة فانيليا صغيرة

٣ معالق كبيرة كريم شانتيه

كيس بودرة آيس كريم فانيليا

طريقة التحضير.

بغسل الرز وبحطه في حله على النار مع الميه لغاية ما يستوى. 

نضيف اللبن مع التقليب المستمر، ونسيب كوباية هنحتاجها بعدين. 

نضيف السكر مع التقليب المستمر، أول ما يتقل والرز يكون استوى كويس جدا.

 نضيف على كوباية اللبن بودره الكريم شانتيه وبودرة الآيس كريم وادوبهم فيها كويس، وأضيفها على الرز وأفضل اقلب لحد ما كل المكونات تدوب وتتجانس مع بعضها، في الآخر نضيف الفانيليا عشان تدى طعم وريحة حلوين للوصفة.

اغرف في أطباق مناسبة ونسيبه يبرد شوية وبعدين نبدأ في مرحلة التزيين.

التزيين

فاكهة وآيس كريم
صوص كراميل
صوص شيكولاتة

شاهد فيديو طريقة تحضير صوص الشيكولاتة فى المنزل من هنــــا
أوريو
سوداني وفستق مجروش
تمر وموز

دى كانت وصفتنا.. نتمنى تعجبكم.. 

ولو عندكم أى استفسارات تقدروا تدخلوا على الرابط ده وتسألوا صاحبة الوصفة مباشرة عن أى حاجة تخص الوصفة.. وبالهنا.