البسبوسة الحلوى الشرقية المصرية الأصول، اللى بنحبها طول السنة، وفى شهر رمضان الكريم بيكون لها مكانة أساسية على سفرة الحلويات بعد وجبة الفطار.. البسبوسة كلمة عربية مشتقة من الفعل بَسَّ، وبسَّ الدَّقيقَ يعني بلّله بالماءِ أو خلطه بسَمْن أو زيْت.. البسبوسة بتتعمل بدقيق السميد، وفى طرق كتيرة لتحضيرها ولتزيينها.. منها البسبوسة بالقشطة، وبالزبادي، والبسبوسة بالمكسرات، وغيرها كتير، لو عاوزين تعرفوا معلومات اكتر عن البسبوسة افتحوا الرابط ده

طريقة تحضير بسبوسة باللوز سهلة جدا ومعانا هتطلع أحلى من المحلات.. تعالوا نعرفها مع بعض.

طريقة تحضير بسبوسة باللوز:

المكونات:

1/2 كيلو سميد بسبوسة

1/4  كيلو سكر = 1 كوب و ربع

3/4 كوب لبن "حليب"

4 ونص معلقة كبيرة سمن طري

نصف معلقة صغيرة بيكينج بودر "يمكن الاستغناء عنه"

ملعقة صغيرة فانيليا

معلقتين و نص معلقة كبيرة جلوكوز أو عسل نحل أو شربات تقيل (كوب سكر + نص كوب ماء ونصف ليمونة) 

ربع كوب جوز هند (يمكن الاستغناء عنه)

لوز أو أى مكسرات أخرى حسب الرغبة

مقادير الشربات:

2 كوب ماء

2 كوب سكر

عصير ليمونة

طريقة التحضير.

يتم تقليب اللبن والسكر والعسل النحل جيدا ثم يضاف السمن إلى أن تختلط جميع المكونات جيدا مع بعضها البعض.

يتم تقليب المواد الجافة على بعضها السميد وجوز الهند والبيكينج بودر والفانيليا
ثم تضاف على السوائل ويتم العجن بشكل بسيط بأطراف الأصابع، يعنى ما نعجنش قوى ونقلب كتير لأن دا اللى بيخلى البسبوسة تنشف، يدوب يتقلبوا فى بعض وبتكون العجينة مرملة 
عاملة زى الرملة اللى عليها ميه.

تتفرد العجينة فى صينية مقاس 32 مدهونة سمن
وتتزين باللوز أو أى مكسرات أخرى حسب الرغبة.

تدخل فرن متوسط الحرارة ( 180°م) حوالى من نص ساعة لساعة إلا ربع أو على حسب حرارة فرنك. 
أول ما تطلع من الفرن وهى سخنة تتسقى بالشربات الساخن، وتتغطى شوية ودى تانى ملحوظة مهمة بتخلى البسبوسة طرية.

وخلوا بالكم إن صوت الشربات على البسبوسة بيعمل تششششش ودا أول دليل على نجاحها.

ملاحظات مهمة:

البسبوسة ما بتتعجنش جامد يدوب الدقيق يتشرب السمنة والسوائل وخلاص.

العجينة بتكون مرملة مش سايلة.

 أول ما تخرج من الفرن سخنة تتسقى بالشربات الساخن انا باعمله و هى فى الفرن عشان يبقى سخن وتتغطى بعدها.

أنا جربتها بالجلوكوز وبالشربات التقيل وبالعسل النحل وكلها نفس النتيجة. شوفوا الأسهل والمتوفر أنا بقيت استسهل واعملها بالعسل النحل.

على فكرة الوصفة دى ناجحة جدا وطعمها أحلى من اللى بنشتريه من المحلات.. ولو عندكم استفسارات اضغطوا على الرابط ده ووجهوا استفسارتكم لصاحبة الوصفة، وبالهنا.