الحلويات عموما مهم تبقى موجودة كل فترة فى البيت، وخصوصا فى المواسم زى رمضان والأعياد، والفترة الأخيرة، لاحظنا تطوير رهيب فى أصناف الحلويات الشرقية الرمضانية، يعنى الكنافة اللى كنا نعرفها كانت يا دوب كنافة بالمكسرات أو بالقشطة، والقطايف كانت بردو نفس النظام، لكن دلوقتى بقى من كتر أنواع الإبداع فى أشكال وطرق الحلويات الشرقية الرمضانية مبقاش عندنا وقت نلاحق على الأصناف، لكن معانا فى جوا الحلة هتلاقوا كل جديد وبطريقة سهلة، وأحلى فى طعمها من طريقة المحلات.. تعالوا نعمل مع بعض صنف جديد جدا ومميز جدا من الحلويات الشرقية، تعالوا نتعلم طريقة تحضير تارت الكنافة.

طريقة تحضير تارت الكنافة:

المكونات:

1/2 كيلو كنافة "يُفضل تكون مفرزة"

1/2 كوب سمن بلدى

2 ملعقة كبيرة سكر بودرة

للحشو:

كريم باتسييري

كريمة لبانى

جبنة بريزيدن أو جبنة كيرى

ملعقة كبيرة قشدة

ملعقة كبيرة لبنة

للشربات:

2 كوب سكر

1 كوب ماء

عصير ليمونة واحدة

لتزيين الواجهة:

(بلوبيرى، نوتيلا، كراميل، مانجو، فراولة، كيوى) 

طريقة التحضير.

نجيب نص كنافه نفركها كويس جدا ويفضل تكون مفرزه نرش عليها معلقتين سكر بودره ونقدح نص كوب سمنه ونرشها عليها ونبسها كويس.

نجيب صنية التارت نبطنها سمنة ونفرد الكنافة ونبططها كويس جدا وندخلها على الشبكة فى الفرن لغاية ما تحمر.

نكون محضرين شربات تقيل بارد، نرش منه كمية بسيطة، ونتركها على جنب.

نكون محضرين الحشو كريمة لبانى على جبن بريزيدون أو كيرى على كريمة باتسيرى، أنا أضفت معلقة قشطة ومعلقة لبنة وده اختيارى.

نفرد الحشو وندخله التلاجه يشد نكون محضرين التوبينج، كراميل وبلو بيرى وفراولة ونوتيلا مخففه بشوية لبن أو كريمه ومانجه وكيوى.

لتحضير الشربات:

فى وعاء عميق مناسب، نضع السكر على النار، ثم نُضيف إليه الماء ونٌقلب جيدا، وبعد دقيقتين من التقليب المستمر، نُضيف عصير الليمون، الذى يساعد كثيرا فى ربط السكر والماء ببعضهما لتكوين عسل الشربات، ونتركه على نار هادئة لمدة 10 دقائق حتى يتكرمل "حتى يصبح سميكا"، ثم نرفعه من على النار، وندعه يبرد قليلا فى درجة حرارة الغرفة، ثم نقوم بسكبه فوق صينية الكنافة التى قُمنا بتجهيزها مسبقا.

يتم تقسيم واجهة الكنافة إلى عدة أجزاء، حيث نقوم بتزيين كل جزء من الأجزاء باستخدام أحد أنواع الفواكه والصوصات المذكورة فى المكونات، الفراولة، وشيكولاتة نوتيلا، وكراميل، ومانجة، وكيوى.

يقطع تارت الكنافة حسب الرغبة، ثم يُقدم.

دى وصفتنا لتارت الكنافة، أو تارت الأحلام، عشان كل اللى بتحلموا بيه من فواكه أو صوصات هتلاقوه فيه، أتمنى إنها تكون وصفة سهلة، لو عجبتكم، انضموا لجروبنا عشان نشارك سوا وصفات الأكلات وتكونوا جزء من عالمنا.

وتقدروا تعرفوا تفاصيل أكتر عن الوصفة والتواصل مع صاحبتها مباشرة من هنا.