طاجن الرز المعمر.. روايح الخير اللى بتخرج من أفران بيوتنا فى الريف المصرى والصعيد.. الفرن اللى بالطمى.. والفخارة اللى من صنع ايدينا والقشطة واللبن البلدى.. والرز اللى من إنتاج أرضينا.. الأكلة اللى كل مكوناتها كانت من خير أرضنا وشغل أهالينا!! لما نتكلم عن الرز المعمر نتكلم عن وصفة دسمة للغاية.. عاوزة حد بايع قضية الدايت أو التخسيس.. حد ناوى يضرب الوزن الزيادة فى الحيطة وياكل طاجن كفيل إنه يملا المعدة ويزود الوزن.. الرز المعمر كله سمن بلدى وقشطة بلدى وحليب كامل الدسم.. ده غير طبعا النشويات اللى موجودة فى الرز ولما يبقوا كل دول على بعض فى طاجن يبقى على الوزن السلام!! تعالوا نتعرف مع بعض على مكونات وطريقة تحضير طاجن رز معمر يفتح النفس.

طريقة تحضير أرز معمر: 

المكونات:

3 كوب أرز مصرى أبيض

3 كوب حليب كامل الدسم

3 ملعقة طعام سمن بلدى

ملعقة شاى ملح

3 ملعقة طعام قشدة بلدى

2 كوب ماء صنبور

طاجن فخار متوسط الحجم

طريقة التحضير.

يُغسل الأرز جيدا بالماء الجارى، ثم يُصفى من الماء الزائد.

فى طاجن الفخار، نضع الأرز المغسول المُصفى، والملح والحليب والسمن البلدى والقشدة ونُقلب المكونات جيدا بملعقة مناسبة.

نقوم بتقليب الأرز بملعقة مناسبة مع باقى المكونات المُضافة، حتى تمتزج كافة المكونات ويذوب الملح، ويُراعى أن يكون ربع طاجن الفخار غير مُمتلئ لأن الأرز أثناء التسوية سوف يتضاعف فى الحجم ويرتفع.

نقوم بتسخين الفرن على درجة حرارة 180°م لمدة ربع ساعة، ثم نضع طاجن الفخار فى الرف الأوسط، ويُراعى وضعه على الرف الأوسط حتى لا يفور الحليب ويسقط من الطاجن وتفسد الوصفة أثناء تنفيذها.

يترك طاجن الأرز المعمر فى الفرن مدة ساعة تقريبا حتى يصل للتسوية التامة، ويتم وضعه تحت الشواية مدة 5 دقائق للحصول على وجه أحمر جميل.

يقدم الأرز المعمر مع البط البلدى والملوخية على سفرة غداء شهية ودسمة.

دى وصفتنا للرز المعمر، وصفة مُجربة كتير وعلى مدار سنين طويلة، وصفة ناجحة، وهى دى الوصفة اللى بتطلع شبه اللى بتاكلوها فى الفلاحين، عايزين نعرف التجربة بتاعتكم فى عمل الرز المعمر، شاركونا رأيكم وصوركم على صفحتنا الرسمية على الفيسبوك وبألف هنا.