ومن لم يأكل الأجنحة على شكل لولى بوبس فقد فاته الكثير. تخيل قدامك كده على ترابيزة السفرة فاتح شهية بيتقدم أنت مش عارف هو إيه، بس شكله مُغرى، لأنه عامل زى شكل المصاصة بالظبط، متقدم بطريقة شيك، بحيث إن ملفوف من تحت بورق قصدير ومكور من فوق زى المصاصة، بصراحة ريقى جرى وأنا بكتب الكلام، تبص له كده وتقول : " يا ريتك تكون لى لوحدى"! ولم لا؟! الوصفة دى بالنسبة للصغار، حاجة عبقرية، بتخليهم ياكلوا بسهولة وبتكون مُشجعة جدا لمعدتهم لأن شكلها لايق عليهم وعلى شخصيتهم الطفولية البرئية، طبعا ما هى على شكل مصاصة ومفيش طفل مش بيحب المصاصة.

بتعجبنى جدا الست اللى بتهتم بتفاصيل الأكل فى بيتها، بتهتم بتقدم إيه جنب إيه، وشكل السفرة يكون إزاى، وكل طبق طريقة تقديمه تبقى أحلى لو اتقدم بشياكة، بحب الست اللى بتطبخ بمزاج ونفس مفتوحة تكرم بيها أهل بيتها وضيوفها لو كانت عندها عزومة، وبيكون شئ رائع إن فى كل مرة بنعمل فيها أكل لأهل بيتنا أو لضيوفنا، إننا نقدم صنف أو أكتر لول مرة ياكلوهم من إيدينا، بتكون مفاجئة الأصناف الجديدة على سفرة الأكل، أجمل من طعم الأصناف دى نفسها. تعالوا نتحرك بسرعة ناحية المكونات والوصفة ونتعلمها سوا. 

المكونات:

نصف كيلو أجنحة دجاج

ملعقة طعام صويا صوص

ربع ملعقة طعام زنجبيل طازج مفروم

1/2 ملعقة طعام ملح

1/2 ملعقة شاى فلفل أسود مطحون

للطبقة الخارجية

كوب دقيق

2 ملعقة طعام نشا

ربع كوب لبن رايب

1 بيضة

1/2 ملعقة طعام ملح

1/2 ملعقة شاى فلفل أسود مطحون

ملعقة شاى من التوابل الآتية: (ببريكا، شطة حمراء)

1/2 لتر زيت قلى

طريقة تحضير أجنحة الدجاج لولى بوبس:

يتم تقطيع الأجنحة بحيث نعمل على إزالة طرفها السفلى المدبب وذلك باستخدام سكين حاد.

يتم غسل الأجنحة جيدا بالماء والخل، ثم تشطف جيدا ويبدأ تجهيزها.

يتم تحضير الجنحة على شكل مصاصة وذلك بتقسيم الجناح الواحد إلى قسمين، وتعتمد عملية التقسيم على العظام الموجودة بالجناح، فنحاول أن نستشعر عن طريق اللمس بأصابع اليد مكان العظم، ونُقسم الجناح إلى قسمين، ثم بواسطة سكين مناسب وحاد، نبدأ فى إخلاء اللحم من أسفل العظمة إلى رأسها بحيث يتجمع اللحم فى اتجاه واحد، ونقوم بعد ذلك بتكويره. فى حالة صعوبة إجراء عملية خلى العظم فى المنزل، أثناء شراء الأجنحة اطلبى من البائع أن يُحضرها لك على شكل دبابيس، ثم اتبعى باقى خطوات الوصفة بالمنزل.

نقوم بتتبيل الأجنحة، وذلك بخلط الصويا صوص والزنجبيل المفروم والملح والفلفل مع بعضهم جيدا، ثم نقوم بوضع الأجنحة داخل تلك التتبيلة، ونُقلب الأجنحة جيدا، ونتركها داخل الثلاجة لمدة ساعة حتى تتشرب التتبيلة جيدا.

فى طبق عميق نقوم بتحضير الكسوة الخارجية للأجنحة، فنُضيف المكونات الآتية: (2 كوب دقيق، نشا، بيضة، لبن رايب، ملح، فلفل أسود مطحون، ببريكا، شطة حمراء)، ونقوم بتقليب جميع المكونات جيدا بملعقة خشبية، ثم نُضيف أجنحة الدجاج، بعد مرور ساعة على تتبيلها، إلى مكونات الطبقة الخارجية، ونُقلبها جيدا حتى تكتسى كل أجزاء الأجنحة تماما من منطقة التكوير.

فى وعاء عميق، نضع زيت القلى على نار متوسطة ونتركه حتى يسخن. نبدأ بعد ذلك فى إضافة قطع أجنحة الدجاج إلى زيت القلى الساخن، ونُراعى أن يغمر الزيت منطقة تكوير الأجنحة داخل الوعاء حتى لا نضطر لتحريك القطع كثيرا داخل الزيت، مما يسبب تفكك الخلطة الخارجية.

تأخذ القطعة حوالى من 5-8 دقائق فى زيت القلى لتصل لمرحلة التسوية، ويجب ألا نُخرج قطع الأجنحة من الزيت بمجرد تغير لون الطبقة الخارجية للون الذهبى البنى، لأن لون الطبقة الخارجية يتحول سريعا للون الذهبى البنى، قبل وصول لحم الدجاج من الداخل إلى التسوية الكاملة. نستخرج قطع الأجنحة، ونضعها على ورق المطبخ لنتخلص من الزيت الزائد.

نترك القطع لتبرد قليلا، ثم نبدأ فى تحضيرها للتقديم، وذلك بقطع أجزاء صغيرة من ورق القصدير (ورق الفويل) ثم لفها أسفل منطقة العظم بشكل مُناسب، كما فى الصورة، ثم تقدم كطبق فاتح للشهية على سفرتك الغنية بالوصفات الأخرى.

يا رب تكون وصفتنا سهلة ودمها خفيف، جربوها فى البيت وحاولوا تراعوا إنكم لما تعملوها تبقى هتتاكل فورا وفى وقتها عشان ده بيفرق جدا فى الإحساس بالطعم خصوصا مع وجود ضيوف على سفرتك، الوصفة دى كمان حلوة جدا كوجبة سريعة "سناك" لأطفالكم وهمه لسه راجعين من المدرسة، بس نراعى إننا نقلل كمية الشطة عشان صحتهم.