كورنيش النيل، الشتا، وكوباية الحلبسة، الأصدقاء التلاتة لذكرياتى عن حمص الشام، وغالبا هى ذكريات لأغلب المصريين مش ليا أنا لوحدى.. مين فينا موقفش على كورنيش النيل فى المنيل أو على كوبرى الدائرى أو على كورنيش النيل فى وسط البلد فى عز الشتا والبرد وطلب كوباية حلبسة سخنة مولعة وعليها رشة الشطة وعصير الليمون؟! آآآآآه يا قلبى الوصفة دى بتعمل لى قلق فى شريط الذكريات بتاعى، بتستفزه بكل ما فيه من حلو ومُر، بترجعنى لأشخاص وأماكن كانوا فى يوم من الأيام غاليين عليا ودلوقتى ملهمش أى وجود!! غريب جدا إن وصفة زى الحلبسة تجمعنا مع الناس ولما ناكلها تانى بعد سنين من غيرهم نفتكرهم، يمكن نتوجع لأنهم مش معانا، ويمكن نقول "الحمد لله إنهم مش معانا"، بس الأكيد إن الحلبسة لسه بين ايدينا بمتعنا وتدفينا!

أنا اتعلمت عمل أحلى وأروع حلبسة من والدى، ربنا يبارك لنا فى عمره وصحته، هو كان بيعملها بحرفنة يشهد له بيها الجميع، حرفنة أسطى حلبسة من الدرجة الأولى، مفيش حد من قرايبنا أكل الحلبسة من ايده ونسيها أبدا، بابا عبقرى حلبسة، عارف الخلطة المظبوطة للتوابل بتاعتها مع ظبطة الصلصة والمية والطماطم، كل حاجة فيها سرها عنده، وطبعا مبخلش عليا بسر الوصفة اللى عمر ما طعمها يتمحى من ذاكرتى لا أنا ولا قرايبى اللى اكلوها من ايديه الحلوين الطيبين.. احنا فى البيت أصحاب دماغ جامدة فى الحلبسة، وليه لأ وهى بتتعمل لنا من صغرنا بكفاء تفوق بمراحل اللى بيتعمل بره البيت، كل اخواتى وأنا لما نشم ريحة حمص الشام من على باب البيت تحت، نجرى على السلم فى سباق ماراثونى للحصول على المركز الأول أمام حلة الحلبسة، وخطفها فى حضن الفائز بالسباق والباقى عليه إنه يصارع على طلب كوباية واحدة يمكن ينول الرضا! أقدر أقول لكم إننا لو كان عندنا حلة حمص شام فيها نص كيلو حمص بالحبشتكانات بتاعته كانت كبيرها نص ساعة ونقول عليها "البقاء لله" كانت بنت حلال وطعمة أوووووى، مكنش بتقعدل لنا حلة حمص فى البيت ساعتين على بعض، حتى لما كبرنا، بنفضل نروح ونيجى على المطبخ لحد ما نقوم بيها ونقضى عليها تماما، ونلاقى بابا الراجل الطيب الحنون دخل ينقع لنا حمص تانى عشان يعمل حلبسة جديدة، وهكذا!

الإضافات اللى بتتحط على كوباية الحلبسة، من شطة وكمون وليمون بترفع مستواها لمراتب التميز فى الطعم والرائحة والمذاق، وبتسبب حالى دفئ رهيبة، لأن الشطة بتدفى ويا سلام بقى على إحساس الدفئ فى برودة الشتا، حاجة عظيمة.. يا ترى ايه احلى عربية حلبسة كلتوا وشربتوا من عليها؟! كانت فين؟! فاكرين اسم صاحب العربية؟! أكيد منستوش اكتبوا لنا ذكرياتكم عن الحلبسة فى تعليقات على المدونة وعلى صفحتنا على الفيسبوك وتعالوا نتعرف سوا على فوايد حمص الشام على صحتنا وجسمنا وبعدين نتعلم أسعل وصفة لعمل حمص الشام أو الحلبسة زى ما الكل بيقول عليها!

فوائد حمص الشام:

حُمص الشام المسلوق، مدرّ للبول، يعالج المفاصل وآلامها، وخاصّة عظام الظهر. منشّط للأعصاب. يفتت الحصو المتراكم على الكلى، كما أنه يفتت الحصو الموجود في المسالك البولية.  يحافظ على صحّة القلب، ويقيه من التعرّض إلى الجلطات القلبية. يحافظ على صحة الأوعية الدموية، ويقيها من التصلب. يفتح سدّد الطحال، والكبد. يحمي الجسم من الإصابة بأمراض السرطان، وسرطان القولون. يحفّز نمو الشعر الجديد. يخفض من نسبة الكولسترول الضار في الدم، ويرفع الكولسترول النافع في الجسم. ينظّم مستوى السكر في الدم، حيث يخفض من نسبة السكر لمرضى السكري. يبني العضلات، ويساعد في أداء وظائفها.  يبني الأنسجة في الجسم، ويصلحها في حالة التلف. يعطي الجسم القوة، والنشاط.  يوفّر البروتين الضروري لنمو جسم الأطفال الرضع. يخفض من مستوى ضغط الدم المرتفع . يعالج الروماتيزم. يكافح السمنة. مضاد للأكسدة ويحسّن المزاج. يحافظ على صحّة الجهاز الهضمي. ينظّم حركة الأمعاء. يعالج الإمساك. يسهل عملية الهضم. يجعل الفرد يشعر بالشبع وامتلاء المعدة، مما يساعد في تخفيف الوزن الزائد. مليّن للمعدة.

طريقة تحضير حمص الشام – الحلبسة:

المكونات:

نصف كيلو حمص شام

بصلة كبيرة مفرومة ناعم جدا

4 فص ثوم مفروم

عصير طماطم (2 حبة طماطم كبيرة)

ملعقة طعام معجون طماطم

2 ملعقة طعام ملح

1/4 ملعقة شاى فلفل أسود مطحون

ملعقة ونصف طعام كمون مطحون

ملعقة شاى ببريكا

ملعقة شاى شطة حمراء ناعمة (حسب الرغبة)

عصير ليمون

طريقة التحضير.

يتم نقع حمص الشام فى وعاء عميق به 2 لتر من ماء الصنبور لمدة من 12- 24 ساعة حتى تنتفش حبيباته، ثم يُصفى من ماء النقع ويُشطف جيدا تحت ماء الصنبور.

فى وعاء عميق مُناسب، نضع حمص الشام المنقوع ونُضيف إليه حوالى 4 لتر ماء، ثم نضعه على نار مرتفعة حتى يغلى الماء، بعد ذلك نرفع غطاء الوعاء ونقوم بإزالة الريم المتكون على وجه الماء بعد الغلى، وذلك بواسطة ملعقة مناسبة حيث نرفع بها الريم ونتخلص منه.

نُضيف بعد ذلك عصير الطماطم والبصل المفروم والثوم المفروم للماء، ونُقلب المكونات جيدا، ثم نُضيف معجون الطماطم والملح والفلفل والكمون والببريكا ونقلب مرة أخرى، ونُغلق غطاء الوعاء مع مواربته حتى لا يفور الماء ويُطفئ الشعلة.

نقوم بخفض درجة حرارة شعلة البوتاجاز بعد غليان الماء إلى متوسطة-منخفضة، ونترك الحمص لمدة تتراوح ما بين ساعة إلى ساعة ونصف حتى يصل لتمام التسوية، ونتخبر التسوية برفع حبات من الحمص من الوعاء والضغط عليها بأصابع اليد فإذا انهرست بسهولة دل ذلك على حُمص الشام أصبح جاهزا.

نُطفئ النار، ثم نضع حمص الشام أو الحلبسة فى الأكواب المناسبة له ثم نضيف له عصير الليمون والمزيد من الشطة الحمراء والكمون حسب الرغبة، ولكن يُفضل عدم إضافة عصير الليمون للمكونات أثناء التسوية حتى لا يطعى مذاقا مُرَّا للوصفة.

ملحوظة مهمة:

أثناء التسوية سنلاحظ تبخر الماء الموجود بالوعاء، وفى هذه الحالة يجب إضافة المزيد من الماء باستمرار أثناء عملية التسوية، حيث نُضيف نصف لتر ماء كلما وجدنا الماء تبخر، وتتكرر هذه الخطوة عدة مرات أثناء مرحلة التسوية حتى لا يجف ماء الحمص.

هاه.. عجبتكوا الوصفة، لو أيوه سيبوا لنا رأيكم فى تعليق، ولو نفذتوا الوصفة صوروها وابعتوا لنا الصورة فى تعليق على صفحتنا على الفيسبوك.