الكريب من الوصفات اللى عملت معركة على السوشيال ميديا وخصوصا فى جروبات الأكل العربى، السيدات والبنات بيتخانقوا على الكريب، هل هو بيتعمل بالبيض واللبن، والا بالدقيق "الطحين" والميه بس؟! ويفضل التنافس المعلوماتى شغال فى الجروبات على حقيقة المعلومة، وكل واحدة بتحاول تثبت صحة كلامها، الحقيقة الكريب بيدخل فيه اللبن والبيض، وده أصل المكونات بتاعته زى ما المطبخ الفرنسى بيقول فى الكتاب.

الكريب فى ناس كتيرة بتعتبره وجبة مشبعة، أو تصبيرة لحد ما ييجى معاد الغدا،، ولما يبقى الحشوة بتاعته لحمة مفرومة مع الجبنة الموتزريلا،، يبقى أكيد الطعم مش محتاج تفاصيل من جماله. فكرة إنكم تعملوا الكريب على سفرة عزومة أو غدا أو عشا فكرة هايلة، وتقدروا تعتبروا ساعتها الكريب استفتاح للأكل، زيه زى السمبوسك. تعالوا بسرعة نروح نتعرف على طريقة تحضير كريب بحشوة اللحم المفروم "العصاج" والموتزريلا.

طريقة تحضير كريب بحشوة اللحم المفروم "العصاج" والموتزريلا:

المكونات:

لعمل الكريب:

كوب حليب

كوب دقيق

بيضة

رشة ملح + رشة فلفل أسود

ملعقة كبيرة زيت نباتى

1/2 ملعقة صغيرة فانيليا

لعمل الحشوة:

1/4 كيلو لحم مفروم

2 بصلة صغيرة مفرومة

1/2 كوب مشروم مقطع شرائح

1/2 ملعقة صغيرة من توابل السبع بهارات

رشة قرفة + رشة جوزة الطيب

رشة ملح + رشة فلفل أسود

1/2 كوب جبنة موتزريلا مبشورة

طريقة التحضير.

يوضع في الخلاط مكونات الكريب المذكورة سابقا، وفى الخلاط يخلطوا جيدا حتى تمام الانسجام.

يصب مقدار مغرفة كبيرة في طاسة الكريب، "غير قابلة للالتصاق"، مدهونة بقليل من الزيت مرة واحدة، وساخنة وتحرك الطاسة بشكل دائري حتى توزع كل الكمية في الطاسة.

عندما تحمر عجينة الكريب من أسفل، تقلب على الجهة الثانية حتى تحمر قليلا ونكمل كل الكمية بنفس الطريقة.

الحشوة:

يوضع مقدار ربع كيلو من اللحم المفروم في طاسة ساخنة ويقلب جيدا حتى يقترب من النضج ثم يوضع عليه بصلتين مفرومين ونصف كوب من المشروم المعلب ونصف ملعقة صغيرة سبع بهارات أو بهارات لحمة ورشة قرفة وجوزة الطيب ورشة ملح وفلفل أسود وتقلب جيدا مع بعض حتى تجف السوائل وتنضج.

بعد أن تبرد الحشوة قليلا يوضع عليها نصف كوب جبن موتزاريلا مبشور.

يوضع مقدار ملعقتين كبار من الحشوة في كل حبة كريب وتغلق كالسرة بأوراق الثوم المعمر أو ممكن أوراق البصل أو حتى خيط سميك يتحمل الحرارة.

تدهن أطراف الكريب بالقليل من زيت الزيتون وتوضع في الفرن على ١٨٠ °م لمدة عشر دقائق حتى يحمر الوجه قليلا ويأخذ اللون الذهبي الجميل.. وبألف هنا وشفا يارب

دى كانت وصفتنا.. نتمنى تعجبكم.. ولو عندكم أى استفسارات تقدروا تدخلوا على الرابط ده وتسألوا صاحبة الوصفة مباشرة عن أى حاجة تخص الوصفة.. وبالهنا.