استخار واختار.. فِشَّة ومُمبار.. الأجزاء الداخلية للعجل أو الخروف، مش مجرد حاجات عادية دى وصفات أكلات محلات كبيرة عايشة على تقديمها، وعاملة بيها شُهرة واسعة، وليها محبين ومعجبين كتير، زى الفِشة (الرئتين). وصفة الفشة تعتبر من وصفات عيد الأضحى المُهمة، وده لأن فى العيد الكبير بيكون موسم اللحمة والكل بيحاول يوفرها فى بيته، والكل بيحاول ياكل من كل أجزاء الدبيحة الخارجية والداخلية، الإنسان فى العيد الكبير مبيرحمش ومعندوش تفاهم فى أكل اللحمة مهما كان الجزء ده من الدبيحة! المصريين من كتر ما بيحبوا الأجزاء دى فى الدبيحة طلعوا عليها اسم شُهرة وسموها "الحلويات"، ومنهم ناس بتسميها "فواكه المدبح"، يعنى بيدلعوها بأسامى حلوة وظريفة عشان يبينوا قد إيه عشقهم للفشة وغيرها من أجزاء الدبيحة.

طريقة عمل الفشة سهلة، أهم جزء فيها التنظيف عشان نتخلص من أى روايح مش محببة أو من الظفارة، وبعد كده مفيش خطوات كتير، بتتحضر بسهولة وبمكونات بسيطة زى ما هنعرف، وبيكون طعمها جميل مع التوابل والبصل والفلفل الرومى، وبتتميز الفشة بإنها غنية جدا بالبروتينات اللى بتفيد الجسم، لكن من عيوبها إنها ممكن تسبب عُسر هضم، ده غير النسبة الكبيرة اللى فيها من الدهون والكوليسترول. تعالوا نتعرف مع بعض على طريقة عمل الفشة.

طريقة عمل الفشة "فشافيش" "الرية":

المكونات:

قطعة فشة بقرة أو خروف

حبة بصل أبيض متوسطة مُقطعة شرائح

3 فصوم ثوم مقطع شرائح

فلفل رومى مقطع شرائح

ملح، فلفل أسود، كمون

 شطة حمراء (حسب الرغبة)

قطع دهن البقرة أو الخروف مقطعة شرائح

ورق لورا

حبهان

حبة بصل أبيض مقسمة لأربع أجزاء

طريقة التحضير.

يتم غسل الفشة جيدا، وتُنقع فى وعاء عميق به ماء وملح وعصير ليمون، لمدة ساعتين على الأقل، وذلك لضمان التنظيف الممتاز، بعد ساعتين نقوم بتصفيتها من الماء، وإعادة شطفها بماء الصنبور، استعدادا لعملية طهيها.

فى وعاء عميق، نُضيف كمية مناسبة من ماء الصنبور للوعاء (حوالى لتر ونصف)، ونضع 3 ورقات لورا، و5 حبات من الحبهان (الهيل)، والبصلة المقطعة 4 أجزاء، والبهارات (ملح، فلفل أسود مطحون، كمون)، ونقوم بتغطية الوعاء، ونتركه على نار متوسطة حتى يصل الماء لدرجة الغليان.

نقوم بعدها بتخفيض درجة الحرارة إلى متوسطة هادئة، ثم نضع قطعة الفشة فى الوعاء ونُغطيه، ونترك الفشة لمدة ساعة إلى ساعة ونصف تقريبا حتى تصل للتسوية الكاملة، ويُمكن اختبار مدى تسويتها بواسطة شوكة، فإذا انغرست الشوكة بسهولة فى فشة العجل أو الخروف، فإن هذا يعنى وصولها للتسوية الكاملة. تُرفع الفشة من على النار وتستخرج من الشوربة، وتترك لتبرد قليلا.

فى مقلاة مناسبة، نضع قطع الدهن بعد تقطيعها لأجزاء صغيرة، ثم نُضيف شرائح البصل وشرائح الفلفل الرومى، ونقلبها جيدا مع قطع الدهن وذلك على نار متوسطة هادئة.

نقوم بتقطيع الفشة المسلوقة على هيئة شرائح متساوية، ثم نضيفها فى المقلاة إلى الدهن والبصل والفلفل الرومى، ونُقلب جميع المكونات جيدا بواسطة ملعقة خشبية، ثم نُضيف رشة ملح ورشة فلفل أسود ورشة شطة حمراء (حسب الرغبة)، ونترك الفشة حتى تصل للتسوية التامة، مع مراعاة التقليب المستمر للمكونات.

بعد الانتهاء من تحمير شرائح الفشة، تُرفع من على النار، وتُقدم مع سلطة الطحينة.

هاه.. عجبتكوا الوصفة؟!، لو أيوه سيبوا لنا رأيكم فى تعليق على المدونة بتاعتنا أو صفحتنا الرسمية على الفيسبوك، ولو نفذتوا الوصفة صوروها وابعتوا لنا الصورة فى تعليق على صفحتنا على الفيسبوك. يوم ما تعملى الفشة ممكن تعملى جنبها ممبار وممكن تعملى معاها طبق فتة بالخل والتوم وتبقى سفرة ملهاش حل ومتنسيش السلطات.. وبالهنا.