طريقة تحضير تاكو البيض والأفوكادو بالفاصوليا الحمراء


تاكو البيض والأفوكادو والفاصوليا الحمراء

 

 

 

 

الأكل زى البشر، أكل له مكانة كبيرة فى معدتنا، وأكل والسلام!  احنا اللى بنحدد ده، قصدى معدتنا اللى بتحدده، بتختار تحط مين فى مكانة عالية وتعمله مقام كبير، وتتعامل مع وصفات تانية بعدم اهتمام، بتاكل وبس، وساعات بترفض تاكل الوصفات دى كمان! والمثل المصرى بيقول: "كُل اللى يعجبك"، الأكل مزاج، وكلنا مزاجنا مش زى بعضنا، احنا مختلفين جدا فى الأمزجة، اللى تُقبل عليه أنت فى الأكل غيرك يرفضه والعكس صحيح، بس فى حاجات كده تخليك لازم تجربها، وصفات شديدة فى شكلها فى تركيبتها فى ريحتها، وصفات تشدك ليها كأنها مغناطيس، أنا بصراحة ده اللى بيحصل معايا بالظبط فى وصفات المطبخ المكسيكى، بنجذب لها بطريقة غير طبيعية، وعشان كده حبيت أقدم لكم وصفة لذيذة وجديدة فى مكوناتها من المطبخ المكسيكى المثير، وهى تاكو البيض والأفوكادو والفاصوليا الحمراء، يا سلام والسكينة بتقطع فيها كده بشويش جدا والشوكة بتقرب من الفم عشان تاكل، أووووووووووف وهم الصراحة.

مهم جدا إن الواحد(ة) يجرب أصناف ووصفات جديدة عن اللى اتعود ياكلها باستمرار، المعدة بتمل وتزهق على فكرة، ممكن جدا تطفش مننا وتروح تاكل بره.. ههههههههههههه، احنا عاوزين نحافظ على علاقة متينة بيننا وبين معدتنا، عاوزنها أغلب الوقت تاكل جوا البيت، لأن ده أحسن لها من كل الجوانب، عاوزين لمعدتنا أكل مضمون ونضيف، هى لازم هتاكل بره البيت، بس يكون فى أضيق الحدود، لو فى عزومة أو فسحة أو سفرية، لكن تطفش مننا وتتعود تاكل من بره باستمرار ده اللى مش ممكن نقبل بيه أبدا فى جوا الحلة، عشان كده بنعرض باستمرار وصفات مختلفة ومتنوعة، وبنحاول نعرض عليكم كل جديد وفى نفس الوقت نعرضه بطريقة سهلة فى الفهم وفى التنفيذ.

ثمرة الأفوكادو من الثمار اللى ليها فوايد صحية قوية النفع جدا لجسم الإنسان، لدرجة إنها اتعملت مشروب وبيتباع بشكل كبير فى محلات العصائر فى مختلف أنحاء العالم وأكيد عندنا فى مصر، وبالرغم من إن ثمرة الأفوكادو غالية فى سعرها، إلا إننا نقدر نستخدمها ولو مرة أو اكتر فى الشهر، حسب الميزانية ونستفيد بمميزاتها العظيمة، اللى هنتعرف عليها دلوقتى.

 

فوائد ثمرة الأفوكادو:

ثمرة الأفوكادو تستخدم فى الطبخ النباتى، كبديل عن اللحوم فى السندوتشات والسلطات بسبب احتوائها على دهون عالية، فهى أساسية فى الأطباق النباتية، وتشتهر ثمرة الأفوكادو فى ولاية كاليفورنيا الأمريكية فى استخدامها فى أطباق الدجاج،  أما في بعض البلدان الأخرى مثل إندونيسيا والفلبين وفيتنام والبرازيل، فكثيرا ما تستخدم الأفوكادو فى صورة عصير ميلك شيك.

 

الأفوكادو يحتوي على فيتامين B6 وحمض الفوليك، الذي يساعد على تنظيم مستويات الحمض الأميني ويرتبط ارتفاع مستوى الحمض الأميني مع زيادة خطر الإصابة بأمراض القلب. يحتوي الأفوكادو أيضا على فيتامين E، الجلوتاثيون، والدهون الأحادية غير المشبعة، التي تساعد في الحفاظ على صحة القلب. الأفوكادو ثمرة غنية بمركب يسمى بيتا سيتوستيرول وهو ما ثَبُت فعاليته في خفض مستويات الكوليسترول في الدم، وفقا للدراسة التى أجريت على المرضى الذين يعانون من ارتفاع الكولسترول، فقد تم إدخال الأفوكادو في نظامهم الغذائي لمدة 7 أيام، ولوحظ انخفاض بنسبة 17% في مستويات الكوليسترول الكلي في الدم، وانخفاض بنسبة 22٪ في كل من LDL  الكولسترول السيئومستويات الدهون الثلاثية، وزيادة 11% في مستويات HDL  الكولسترول الجيد. الأفوكادو هي أيضا مصدر كبير للبوتاسيوم الذي يساعد في السيطرة على مستويات ضغط الدم. يمكن للدهون الأحادية غير المشبعة في الأفوكادو أن تعمل على عكس اتجاه مقاومة الأنسولين الذي يساعد على تنظيم مستويات السكر في الدم. يحتوي الأفوكادو أيضا على الألياف القابلة للذوبان والتي تبقي مستويات السكر ثابتة في الدم. 

 

دى كانت بعض فوايد ثمرة الأفوكادو على صحة جسم الإنسان، تعالوا بقى نعرف تاريخ التاكو المكسيكى بسرعة. التاكوز بترجع لأهل المكسيك، وعرفوها قبل دخول الأسبان ليهم، وهى بترجع للكلمة المفردة Taco واللى ليها معانى كتيرة ومن ضمنها الحشوة. مع أوائل القرن الـ20، انتشرت التاكوز فى كل أنحاء أمريكا وكندا، وكان أول ظهور لوصفة التاكوز، فى كتاب الطهى بالولايات المتحدة الأمريكية، كانت سنة 1914، اللى اتوصفت فيها طريقة عمل التاكوز من خبز التورتيا المُحمص، واللى بيتم حشوها باللحم، أو الدجاج، أو حتى الجمبرى.

النهاردة هنعمل معاكم تاكوز البيض والأفوكادو والفاصوليا الحمراء، ونستمتع بالطعم فى كل خطوة من خطوات إعداده وتحضيره.. يلا بينا!

 

المكونات:

بيضة طازجة

ثمرة أفوكادو

100 جرام حبوب فاصوليا حمراء

كزبرة خضراء طازجة

ملعقة طعام زيت زيتون

رشة ملح

رشة فلفل أسود مطحون

ملعقة طعام عصير ليمون

خبز التورتيا

 

طريقة تحضير تاكو البيض والأفوكادو والفاصوليا الحمراء:

 

يتم تحضير البيضة، وذلك بقليها على نار متوسطة إلى هادئة، ففى مقلاة مناسبة الحجم، نقوم بوضع زيت الزيتون، ثم نكسر البيضة بالمقلاة الساخنة، ونقوم برش الملح والفلفل الأسود على صفار البيضة، ونتركها قليلا على النار حتى تصل لمرحلة التسوية، ويُراعى أن تكون المقلاة المستخدمة فى القلى، غير قابلة للالتصاق، كما يجب مراعاة عدم التسوية الزائدة حتى لا ينشف بياض وصفار البيضة. تُرفع البيضة من على النار وتوضع على رغيف التورتيا.

نقوم بتقطيع ثمرة الأفوكادو، حيث نعمل على شقها إلى نصفين، ثم نستخرج البذرة الداخلية، ثم نبدأ فى تقطيعها فى شكل شرائح متساوية ويجب أن تتم هذه الخطوة بسرعة حتى لا يتأكسد الحديد الموجود بالثمرة وتصبح سوداء اللون، ويفضل لتجنب اسوداد الثمرة، أن يتم رشها بعصير الليمون بمُجرد التخلص من البذرة. تُوضع شرائح الأفوكادو على رغيف التورتيا بجوار البيضة.

يتم استخراج حبوب الفاصوليا الحمراء المُعلبة، وتشطف جيدا تحت ماء جارٍ للتخلص من رائحة المواد الحافظة، ثم توضع كذلك على رغيف التورتيا.

يتم تزيين رغيف التورتيا المحتوى على البيضة وشرائح الأفوكادو والفاصوليا الحمراء، بأوراق من الكزبرة الخضراء الطازجة، ويُقدم كوجبة عشاء أو إفطار صحية وعالية القيمة الغذائية.

وصفة مفيهاش مجهود ولا تعب، وقيمتها الغذائية عالية جدا، جربوها وادعولى، ومتنسوش تعملوا شير للوصفة عشان الكل يجرب والكل يستفيد، وبالهنا.