مين فيكوا مُدمن مياه غازية؟! المشروب تقريبا الرئيسى فى حياته بيبسى أو كوكا أو سفن أو ميراندا، ويمكن كل دول مع بعض!! فى كتير مننا وصلوا لمرحلة إنهم استبدولوا الميه، أساس الحياة، بمياه غازية! صعب؟! ومُضر؟! بس والواحد بيشرب الحاجات دى بيبقى شايف إنها لذيذة جدا ومش مُضِرَّة خالص!!

أنا مخبيش عليكم كنت مدمنة بيبسى، بشربه فى كل وقت وأى وقت، لو فتحت التلاجة ملقتش قدامى ازازة يركبنى العفريت، وامشى فى البيت زى المجنونة بدور على الموبايل عشان أعمل أوردر من السوبر ماركت وأنوع فى الطلب بتاعى يعنى آخد لتر بلاستيك، ولتر تانى بلاستيك بردو... ههههههه أصل الإزازة لما بتبقى أكتر من لتر وتتفتح كذا مرة، الصودا بتروح منها!

مهم لصحتنا جدا إننا نشرب عصاير كتير، ومتنوعة، ومهم اكتر تكون معملوة فى البيت، عشان تكون خالية تماما من أى مواد حافظة، ويكون أصلها ومصدرها كفواكه معروف بالنسبة لنا، مهم جدا لأطفالنا إنهم يشربوا عصير صحى ينفع أجسامهم مش يضرها، اعملوا العصير فى البيت يا جماعة واهتموا جدا بصحتكم وصحة أولادكم، بلاش عصير مُعلب تانى! تعالوا نتعرف مع بعض على فوائد الفواكه اللى هنستخدمها النهاردة فى سموزى البطيخ والفراولة الطازج.  

فوائد الفراولة:

تعمل مضدات الأكسدة في الفراولة على تقليل معدلات أمراض القلب.  تعمل الفراولة على تخفيف معدل الالتهابات في الجسم والذي يقود إلى ضعف مناعة الجسم. الفراولة تعتبر من أغنى الفواكه احتواءً على مضادات الأكسدة والتي تحمي من أضرار الشقوق الحرة. نتيجة للتأثير المضاد للالتهابات الذي يحدثه الكيرستين, فإنه يقل معدل الإصابة بالربو.

المكونات:

4 شرائح بطيخ أحمر مثلثة
4 حبات فراولة
1-2 ملعقة طعام سكر (حسب حلاوة قطع البطيخ)
ربع كوب ماء مُثلج أو بارد

طريقة تحضير سموزى البطيخ والفراولة الطازج:

نقوم بخلى شرائح البطيخ من البذرو، ونقطع القشرة ثم نضعه فى كيس ونحكم غلقه، ثم ندخله الفريزر لمدة ساعتين على الأقل أو حتى يتجمد.

نقوم بغسل حبات الفراولة ونضعها فى كيس مناسب ونحكم غلقه ونضعها كذلك ساعتين حتى تتجمد.

نستخرج شرائح البطيخ وحبات الفراولة من الفريزر ونضعها فى الخلاط، ونضيف إليها السكر والماء ونقوم بخلطها جيدا حتى تمتزج جميع المكونات، ثم تقدم.

يمكن تزيين أكواب العصير بقطع من فاكهة الفراولة الطازجة أو بأوراق من النعناع الطازج.

جربوها النتيجة وهمية بجد، وعيشوا الانتعاش الصحى والطبيعى.